आजै दुई डिआइजी कार्कीको मुध्दा पेशी,आजै दुई श्रीमान कार्की अदालत बाहिर
आफ्नो रोलक्रम मिचेर तेस्रो नम्बरको एआइजीलाई आइजीपी बनाएको भन्दै बिश्वराज पोख्रेलले सर्वोच्च अदालतमा हालेको रिटको आज सुनुवाई हुँदैछ । धिरजप्रताप सिंहलाई आइजीपी बनाउने सरकारको निर्णयविरूध्द सर्वोच्चमा परेको रिटमाथि एकछिनमा सुनुवाई हुन लागेको हो ।
उक्त मुध्दा न्यायाधीशद्वय विश्वम्भर श्रेष्ठ र कुमार चुडालको इजलासमा परेको छ । आइजीपी नियुक्ति प्रकरणमा परेको मुद्दामा सर्वोच्च अदालतले यसअघि अन्तरिम आदेश दिन अस्वीकार गरेको थियो । वैशाख २२ गते न्यायाधीश सुष्मालता माथेमाको एकल इजलासले निवेदककर्ताको मागबमोजिम उक्त मुद्दामा अन्तरिम आदेश दिन अस्वीकार गरेको हो ।
विश्वराज पोखरेलले दायर गरेको रिटमा प्रधानमन्त्री तथा मन्त्रिपरिषद्को कार्यालय,गृह मन्त्रालय,प्रहरी प्रधान कार्यालय र आइजीपी धिरजप्रताप सिंहलाई विपक्षी बनाईएको छ ।
अदालतले अन्तरिम आदेश नदिएपछि आइजीपीमा बढुवा भएका धिरजप्रताप सिंह दर्ज्यानी चिन्ह लगाएर हाल नेपाल प्रहरीको नेतृत्व गरिरहेका छन् ।
यता तत्कालीन डिआइजीहरु ईश्वरबाबु कार्की,घनश्याम अर्याल र प्रकाशजङ्ग कार्कीले नेपाल प्रहरीमा गरिएको एआईजी बढुवाको विरुध्दमा हालेको मुद्दा पनि आजै उक्त इजलासमा परेको छ । दुवैजना डिआईजी कार्कीहरु अवकास पाएर घर गएका छन् ।
आजै सर्वोच्चका दुई जना कार्की श्रीमान् जुम्ला पुग्नुभएको छ । कायममुकाय प्रधानन्यायाधीश दीपककुमार कार्की र त्यसपछिका वरिष्ठ न्यायाधीश हरिकृष्ण कार्की उच्च अदालत जुम्लाको भवन उद्घाटनको निम्ति त्यता जानुभएको हो ।
टिप्पणीहरू