जावलाखेलनेर टाउकोमा चोट लागेपछि भरतपुरकी मेयर रेणु दाहाल डा.प्रकाशको निगरानीमा

मेयरमा निर्वाचित भएलगत्तै काठमाडौंमा बिमार आमालाई भेट्न अस्ति बुधवार दिउँसो भरतपुरबाट आउनुभएकी रेणु दाहाल अहिले अस्पताल भर्ना हुनुभएको छ । दाहाल सवार प्रदेश ३-०१-०२३ च ७३१८ नम्बरकाे गाडीको टायर पञ्चर भएपछि सडक किनार बिजुलीको खम्बामा ठोक्किएका कारण उहाँलाई अस्पताल भर्ना गरिएको हो ।

अहिले उहाँलाई दुर्घटनास्थल नजिकै पुल्चोकस्थित सुमेरु अस्पतालको प्राइभेट वार्डमा राखिएको छ । टाउकोमा चोट लागेको आशंकामा अब्जर्भेसनको लागि आज एक दिन अस्पताल भर्ना गरिएको हो । चिकित्सकले खतरामुक्त भने पनि २४ घण्टा निगरानीमा राखिएको पारिवारिक स्रोतले पुष्टि गरेको छ ।

वीर अस्पतालका डा. प्रकाशबहादुर बिष्टले दाहालको अवस्था हेरिरहनुभएको बताइन्छ । बिष्ट पहिले वीर अस्पतालको न्युरो डिपार्टमेन्ट प्रमुख हुनुहुन्थ्यो । उहाँ अहिले सुमेरु अस्पतालको उक्त विभागमा प्रमुख हुनुहुन्छ ।

डा. बिष्टलाई उद्धृत गर्दै स्रोतले भन्यो, ‘त्यस्तो ठूलो समस्या देखिएको छैन । टाउको ठोक्किएकाले आज एक रात अब्जर्भेसनमा राख्न लागिएको मात्र हो ।’