छात्रा यौन दुर्व्यवहारमा आरोपी शिक्षक ‘पटके’ रहेको खुलासा « Jana Aastha News Online
Logo
१३ असार २०७९, सोमबार
|  Mon Jun 27 2022
Logo
१३ असार २०७९, सोमबार
|  Mon Jun 27 2022

छात्रा यौन दुर्व्यवहारमा आरोपी शिक्षक ‘पटके’ रहेको खुलासा

प्रकाशित मिति :  १० जेष्ठ २०७९, मंगलवार १९:००


सौन्दर्य प्रतियोगिताको नाममा आठ वर्षअघि आयोजकले आफूलाई बलात्कार गरेको घटना एक युवतीले बुधवार सामाजिक सञ्जालबाट सार्वजनिक गरेसँगै महिला अधिकारकर्मी, सम्बन्धित निकायलगायतले सामाजिक सञ्जालमार्फत घटनाको उचित छानबिन हुनुपर्ने माग गरे ।

बलात्कार तथा यौन उत्पीडनवारे कानुनमा रहेको हदम्यादउपर पुनर्विचार गर्न संसदमा पनि कुरा उठ्यो । चौतर्फी विरोध र आलोचनापछि आरोपी मनोज पाण्डे शनिवार राजधानीको स्वयम्भूबाट पक्राउ परेका छन् ।

उक्त घटना सार्वजनिक भएको भोलिपल्टै अर्की एउटी युवती (त्यति बेलाकी किशोरी) ले आफू सात वर्षअघि प्रधानाध्यापकबाट दुई वर्षसम्म लगातार बलात्कृत भएको घटना सार्वजनिक गरिन् । काठमाडौंकै एक विद्यालयका प्रधानाध्यापकले आफूलाई ‘ब्ल्याकमेल’ गर्दै दुई वर्षसम्म करणी गरेको ती युवतीले भनेकी छन् ।

उनले प्रहरीमा उजुर गरे पनि आरोपीलाई अझै नियन्त्रणमा नलिएको गुनासो पोखेकी छन् । ती युवतीहरुले घटना सार्वजनिक गरेपछि धमाधम त्यही प्रकृतिका अन्य घटना सार्वजनिक हुन थालेका छन् ।

आफ्नो कलेजमा पनि सोही प्रकृतिको घटना भएको भन्दै आज काठमाडौंको चाबहिलस्थित सेन्ट लरेन्स कलेजका विद्यार्थीहरुले आन्दोलन गरेका छन् । एक जना शिक्षकले कक्षा ११ मा अध्ययनरत विध्यार्थीलाई लामो समयदेखि यौन दुर्व्यवहार गरेको भन्दै विद्यार्थीले बिहान कलेज पोशाकमै विरोध प्रदर्शन गरेका हुन् ।

विद्यार्थी आन्दोलनलगत्तै आरोपी शिक्षक जनार्दन अधिकारी पक्राउ परेका हुन् । अधिकारीले यसअघि पनि काभ्रेको एउटा क्याम्पसकी विद्यार्थीलाई यौन दुर्व्यवहार गरेको तथ्य खुलेको छ । उनले २०६४ सालमा काभ्रेको कुशादेवी क्याम्पसकी एउटी विद्यार्थीलाई यौन दुर्व्यवहार गरेको खुलासा भएको हो ।

दुर्व्यवहार गरेको थाहा पाएपछि शिक्षक, प्रशासन,अभिभावक जम्मा भएर मोसो दल्ने तयारी गर्दै गर्दा अधिकारी त्यहाँबाट भागेका थिए । उक्त घटना सार्वजनिक भए पनि पीडित विद्यार्थी र अविभावकले प्रहरीमा उजुरी नदिँदा अधिकारी पक्राउ पर्न सकेका थिएनन् । तर,उनलाई मोसो दल्ने भनेर गाउँले उत्रिएपछि रातारात कुशादेवी क्याम्पसबाट भागेका हुन् ।

पाँचखालका स्थायी वासिन्दा अधिकारीलाई डेढ दशकअघि यस्तै आरोप लागेपछि राजधानी छिरेका उनले राजनीतिक शक्तिको आडमा अरु धेरै किशोरीलाई बर्बाद पारेको आशंका गरिएको छ । तर पीडित पक्षले प्रहरीमा उजुरी नदिएकाले त्यतिबेला उनी पक्राउ नपरेको प्रहरीले बताएको छ ।

अब अधिकारीविरुद्ध जबरजस्ती करणी वा यौन दुर्व्यवहारको मुद्दा आकर्षित हुने प्रहरी र अधिकारकर्मीहरु बताउँछन् । प्रहरीले उनलाई आजै नियन्त्रणमा लिएर अनुसन्धान अगाडि बढाइसकेको छ । उजुरीको आधारमा मुद्दा अघि बढ्ने प्रहरीको भनाइ छ ।

पछिल्लो समय सार्वजनिक भएका यस्ता घटनाले मुलुकको कानुन, सम्बन्धित निकाय, सुरक्षा समितिहरुको चौतर्फी आलोचना भइरहेको छ । शिक्षा दिने शैक्षिक संस्थामा गुरुहरुबाट किशोरीहरु सुरक्षित नभएको पनि पछिल्ला घटनाले प्रष्ट पारेको छ ।

सुन्दरीलाई बलात्कार गर्ने पाण्डे काँग्रेस निकट भएको खुलेको छ । अधिकारी भने एमाले नेता तथा पूर्वमन्त्री गोकुल बाँस्कोटाको नाम बेच्ने पात्र भएको बताइन्छ । बाँस्कोटा सञ्चारमन्त्री हुँदा अधिकारी सञ्चारविज्ञ रहेको एकथरिको आरोप छ ।


प्रतिक्रिया दिनुहोस !