नबिल बैंक सबै सूचकाङ्कमा अरुभन्दा अगाडि हुने

नबिल बैंक लिमिटेडले नेपाल बंगलादेश बैंक लिमिटेड (एनबी) लाई एक्विजेसन (प्राप्ति) गर्ने सम्बन्धी विशेष प्रस्ताव पारित गरेको छ । हिजो भएको विशेष साधारणसभाले उक्त प्रस्ताव पारित गरेको हो ।

एनबीको सम्पत्ति र दायित्वको मूल्याङ्कन प्रतिवेदन तथा अन्य व्यवस्थाको आधारमा सेयर मूल्य अनुपात १००ः४३ लाई पनि विशेष साधारण सभाले स्वीकृति प्रदान गरेको छ । अब एनबीका सेयरधनीहरुले आफ्नो एक सय कित्ता सेयर बराबर नबिलको ४३ कित्ता सेयर पाउने निश्चित भएको छ ।

साधारणसभाले सम्पत्ति तथा दायित्व मूल्याङ्कन प्रतिवेदन (डीडीए), समझदारीपत्र (एमओयु) तथा अन्तिम सम्झौतापत्रलगायत यसबीचमा भए गरेका सम्पूर्ण काम कारवाहीलाई अनुमोदन समेत गरेको छ ।

अब नबिल बैंकको चुक्ता पुँजी २२ अर्ब ८३ करोड २९ लाख रुपैयाँ पुग्नेछ । कर्जा बिस्तार ३ खर्ब ९ अर्ब र निक्षेप रकम ३ खर्ब २० अर्ब रुपैयाँ पुग्नेछ । त्यसैगरी बैंकको गैरकोषमा आधारित व्यवसायको आकार पनि एक खर्ब ४५ अर्ब रुपैयाँ पुग्ने बैंकले जनाएको छ ।

अब नबिल बैंकको शाखा २५४ वटा हुनेछ । पछिल्लो नौ महिनाको संयुक्त खुद नाफा चार अर्ब ४६ करोड रुपैयाँ पुग्ने उल्लेख छ ।

एनबीलाई प्राप्तिपश्चात् नबिल बैंक वाणिज्य बैंकहरुमध्ये निक्षेप, कर्जा, गैरब्याज आम्दानी, गैरकोषमा आधारित व्यवसाय, कुल नाफालगायतका सूचकाङ्कहरुमा सबैभन्दा अगाडि हुने बताइएको छ ।