विभिन्न देशका राजदूत भेटेर अमेरिकी उप विदेशमन्त्री शरणार्थी शिविरमा

नेपालको तीन दिने भ्रमणमा हिजो काठमाडौं आउनुभएकी अमेरिकी उपविदेशमन्त्री उज्रा जिया केहीबेर अघि तिब्बती शरणार्थीहरुसँग भेटघाट गर्न जावलाखेलस्थित क्याम्प पुग्नुभएको छ । नयाँ दिल्ली ओर्लिएर दलाई लामालाई भेट्न धर्मशाला पुग्नुभएकी उहाँ बिहानदेखिको ब्यस्त कार्यक्रमकै निरन्तरतास्वरुप दिउँसो शरणार्थी शिविर पुग्नुभएको हो ।

११ बजे क्याम्प पुग्ने कार्यतालिका नौ बजेदेखि दूतावासमा शुरु भएको बेलायती,फ्रेन्च,अस्ट्रेलियन,स्वीस,फिनिस,दक्षिण कोरियाली,नर्वेजियन राजदूतहरु र युएनडिपीका मिसन प्रमुखसङ्गको भेटघाट लम्बिएपछि १२:४० मा सरेको थियो । भारतको हिमाञ्चल प्रदेशस्थित दलाई लामाको धर्मशाला र आज ललितपुरको शरणार्थी शिविर पुग्दा उहाँको पोशाक यौटै देखिन्छ ।नेपालको औपचारिक भ्रमणमा आउनुभएकी अमेरिकी उपविदेशमन्त्रीले २४ घण्टासम्म नेपाली अधिकारीहरुसँग औपचारिक भेटघाट गर्नुभएको छैन । हिजो साँझ कमलादीस्थित अमेरिकी राजदूतको निवास कमलकुन्ज र पछि महाराजगन्जको दूतावासमा आयोजित कार्यक्रममा पूर्वसभामुख ओनसरी घर्ती,प्रधानमन्त्री पत्नी तथा काँग्रेस नेतृ आरजु राणा,सञ्चारमन्त्री ज्ञानेन्द्रबहादुर कार्कीलगायतको उपस्थिति थियो ।

भोलि साँझ स्वदेश फर्किने कार्यक्रम सूची रहेको अमेरिकी प्रतिनिधिमण्डलले दिउँसो प्रधानमन्त्रीसहित गृह र परराष्ट्र मन्त्रीलाई भेट्ने बताइएको छ । भारत र नेपाल भ्रमणमा आएको अमेरिकी टोलीको मुख्य उध्देश्य तिब्बती शरणार्थी र दलाई लामासँग भेटघाट गर्नु रहेको स्पष्ट छ ।

जिया तिब्बतसम्बन्धी अमेरिकी विशेष संयोजक पनि हुनुहुन्छ ।