सिन्धुपाल्चोकमा एमाले पहिलोबाट तेस्रोमा झर्यो

१२ वटा स्थानीय तह रहेको सिन्धुपाल्चोक जिल्लाका सात वटा पालिकाको प्रमुख जितेर अघिल्लो चुनावमा पहिलो दल बनेको नेकपा एमाले यसपटक तेस्रोमा खुम्चिएको छ । मतगणनाको सम्पूर्ण परिणाम सार्वजनिक हुँदा एमाले पहिलोबाट तेस्रोमा झरेको हो ।

एमालेले २०७४ को चुनावमा जुगल, त्रिपुरासुन्दरी,पाँचपोखरी,बलेफी र लिसंखुपाखर गरी पाँच गाउँपालिकामा अध्यक्ष जितेको थियो । मेलम्ची र बाह्रबिसेमा मेयर जितेको थियो । यसपटक इन्द्रावती, सुनकोशी र पाँचपोखरी थाङपाल गाउँपालिका मात्रै जितेको छ । अघिल्लो पटक जितेका सबै पालिका गुमाएको एमालेले नयाँ पालिकामा जीत हात पारेको हो ।

गत चुनावमा जम्मा तीन तह जितेको काँग्रेसले यसपटक पाँच पालिकामा नेतृत्व लिएको छ । यसअघि एउटै नगरपालिका जित्न नसकेको काँग्रेसले अहिले बाह्रबिसे र मेलम्ची नगरपालिका एमालेबाट खोसेको छ । भोटेकोशी,हेलम्बु र त्रिपुरासुन्दरी गाउँपालिका काँग्रेसले पाएको छ ।

नेकपा माओवादी केन्द्रले यसपटक चार वटा पालिका जितेको छ । अघिल्लोचोटी दुई तहमा सीमित माओवादीले यसपाली दुई पालिका थपेको हो । चौतारा साँगाचोकगढी नगरपालिका जोगाएको उसले भोटेकोशी गुमाएर बलेफी, लिसंखुपाखर र जुगल गाउँपालिका एमालेबाट खोसेको छ ।

जिल्लाका १०३ वडामध्ये काँग्रेसले ५३,एमालेले ३६, माओवादीले ११, एकीकृत समाजवादी, राप्रपा र स्वतन्त्र उम्मेदवारले एक–एक वडा जितेका छन् । पाँचपोखरी थाङपाल गाउँपालिका अध्यक्ष र उपाध्यक्ष तथा हेलम्बु गाउँपालिका अध्यक्षमा पुरानै अनुहार दोहोरिएका छन् ।

चौतारा साँगाचोकगढीको प्रमुखमा माओवादी केन्द्रका कृष्णप्रसाद सापकोटा ११ हजार ७२ मत ल्याएर निर्वाचित भए । उपप्रमुखमा एकीकृत समाजवादीकी सीता थापा ९ हजार ७२६ मत ल्याएर निर्वाचित भएकी छन् । नगरपालिकामा माओवादी केन्द्र र एकीकृत समाजवादीबीच तालमेल भएको थियो ।

बाह्रबिसेको प्रमुखमा काँग्रेसका बालकृष्ण बस्नेत ७ हजार ७२८ मत ल्याएर निर्वाचित भए । उपप्रमुखमा नेपाली काँग्रेसकै मञ्जु तामाङ ६ हजार ९७७ मत ल्याएर निर्वाचित भइन् । मेलम्ची प्रमुखमा काँग्रेसका आइतमान तामाङ ११ हजार २५८ मत ल्याएर निर्वाचित भएका छन् । उपप्रमुखमा एमालेकी उमा प्रधानले १० हजार १६४ मत ल्याएर विजयी हासिल गरिन् । नगरपालिकामा काँग्रेस र राप्रपाबीच गठबन्धन भएको थियो ।

जुगल गाउँपालिका अध्यक्षमा माओवादीका रेशम स्याङ्बो ५ हजार ५०३ मत प्राप्त गरी विजयी भएका छन् । उपाध्यक्षमा कांँग्रेसका हिमालकुमार श्रेष्ठ ४ हजार ६८९ मत ल्याएर विजयी भए । पालिकामा माओवादी केन्द्र र काँग्रेसबीच तालमेल भएको थियो । त्रिपुरासुन्दरीको अध्यक्षमा काँग्रेसका भक्तध्वज बोहराले ४ हजार २२९ मत ल्याए भने उपाध्यक्षमा काँग्रेसकै गीताकुमारी नेपाल ४ हजार १५६ मत ल्याएर विजयी भइन् ।

पाँचपोखरी थाङपालमा माओवादी र काँग्रेस गठबन्धनलाई हराउँदै अध्यक्ष र उपाध्यक्षमा एमाले विजयी भएको छ । अध्यक्षमा टासी लामा पाँच हजार ६०८ र एमालेकै सुनिता अधिकारीले पाँच हजार ७२२ मत ल्याएर निर्वाचित भएकी छन् । यहाँ अध्यक्ष र उपाध्यक्षमा पुरानै अनुहार दोहोरिएका हुन् ।

बलेफी अध्यक्षमा माओवादीका गंगाबहादुर तामाङले ४ हजार ६६६ मत प्राप्त गरे भने उपाध्यक्षमा काँग्रेसकी सरु लामा तामाङ ४ हजार ३९४ मत ल्याएर निर्वाचित भएका छन् । यहाँ माओवादी केन्द्र र एकीकृत समाजवादीबीच तालमेल भएको थियो । भोटेकोसी अध्यक्षमा कांग्रेसका पासाङ नुर्पु शेर्पाले २ हजार ६०५ मत ल्याए भने उपाध्यक्ष काँग्रेसकै दिछेन शेर्पा २ हजार ७१२ मत ल्याई निर्वाचित भएका छन् ।

इन्द्रावती अध्यक्षमा एमालेका झम्कनाथ नेपाल ७ हजार १२७ मत ल्याएर विजयी भए । उपाध्यक्षमा एमालेकै शोभना तामाङ ६ हजार ५१३ मत ल्याई निर्वाचित भइन् । लिसंखुपाखर अध्यक्षमा माओवादीका राजु लामा तामाङ ३ हजार ९२५ मत ल्याएर निर्वाचित भए । उपाध्यक्षमा एमालेकी मिठू देवी लामाले ३२ सय ५१ मत ल्याइन् ।

सुनकोसी अध्यक्षमा एमालेका टपिन्द्रप्रसाद तिमल्सिनाले ५९ सय ३२ मत ल्याए । उपाध्यक्षमा काँग्रेसकी कान्छी लामा ५ हजार ९०५ मत ल्याई विजयी भइन् । पालिकामा एमाले र माओवादी केन्द्रबीच गठबन्धन भएको थियो । हेलम्बु अध्यक्षमा काँग्रेसका निमा ग्याजेन शेर्पाले ५३ सय ८६ मत ल्याई फेरी दोहोरिए । उपाध्यक्षमा काँग्रेसकै अप्सरा लम्साल लामिछाने ५२ सय १४ ल्याई विजयी भइन् ।