थोरै ठाउँमा उठाएर पनि कलम केही ठाउँमा विजयी

माधव नेपाल,झलनाथ खनाल नेतृत्वको एकीकृत समाजवादी पार्टीले झिनो नै सही सबै प्रदेशमा थोरै उम्मेदवार उठाएर पनि जीतको हिसाबले ठीकै उपस्थिति देखाएको पाइएको छ ।

हालसम्मको परिणामअनुसार सात वटा प्रदेशका ३७ वटा जिल्लामा समाजवादीले दुई प्रमुख,सात उप–प्रमुख,७४ वडाध्यक्ष,२८० वडा सदस्य गरी ३६३ पद जितेको छ । सुदूरपश्चिम प्रदेशको अछाम,बझाङ, डडेलधुरा र डोटीका गाउँपालिकामा नेकपा एसका उम्मेदवार विजयी भएका छन् ।

कर्णालीको डोल्पा, दैलेख,जुम्ला,मुगु, हुम्ला,कालीकोट, जाजरकोट,सल्यानमा पनि समाजवादीकै उम्मेदवार निर्वाचित भएको उक्त पार्टीका उपमहासचिव गङ्गालाल तुलाधरले बताए ।

लुम्बिनीको रूपन्देही र गुल्मीमा पनि समाजवादीको उपस्थिति देखिएको छ । गण्डकीको बाग्लुङ र मुस्ताङमा नेकपा एसका केही प्रतिनिधि बिजयी भएका छन् । बाग्मतीको सिन्धुपाल्चोक, दोलखा,धादिङ, काठमाण्डौं,काभ्रे, नुवाकोट र ललितपुरका केही पालिकाको वडामा समाजवादीले विजय हासिल गरेको उनको दावी छ ।

मधेशको रौतहट, सर्लाही,धनुषा, सप्तरी,सिरहा र बारामा पनि नेकपा एसले उपस्थिति देखाएको बताइन्छ ।