कांग्रेससामु अनि कमरेड लम्पसार
एमाले अध्यक्ष केपी ओलीले पाँचदलीय गठबन्धनलाई ‘विजातीय गठबन्धन’ भनिरहँदा उहाँकै पार्टीका मान्छेहरु जग्गा दलालीको नातामा त्यस्तो गठबन्धन गर्न तम्सिएको उदाहरण संघीय राजधानी काठमाडौंभित्रै भेटिएको छ ।
०७४ को निर्वाचनमा नागार्जुन नगरपालिकाको मेयर चुनाव जित्ने नेपाली कांग्रेस उम्मेदवार मोहन बस्नेतले एमालेका कृष्णहरि खत्रीलाई २ सय ३५ मतले पराजित गरेका थिए । यो काम अरुका कारण हैन, कृष्णहरिकै पार्टीका दुई नेताको कारण भएको हो भनी पार्टीमा उजुरी पनि पर्यो । तर, सुनुवाई नहुँदा अहिले कृष्णहरि माधव नेपाल नेतृत्वको एकीकृत समाजवादीबाट उठेका छन् । उतिबेला जितेका मोहन फेरि पनि कांग्रेसबाटै उम्मेदवार छन् । ०७४ मा कृष्णहरिलाई हराउनका लागि भरमग्दुर प्रयत्न गर्ने भनी आरोपित एमालेका प्रदेश सांसद प्रकाश श्रेष्ठ र केशवराज पोखरेलले अहिले आफ्नो पार्टी जिताउन हैन, जसरी पनि मोहनलाई जिताउन र कृष्णहरिलाई हराउनका लागि भूमिका खेलिरहेको आरोप छ । जबकि त्यहाँ एमालेबाट स्युचाटार निवासी नन्दनहरि गौतम प्रतिस्पर्धी छन् ।
पार्टीले मेयरको टिकट प्रकाशलाई दिएको थियो । तर, मोहनले हार्लान् भनेर प्रकाश उठेनन् । पार्टीले उठाएका नन्दनहरिलाई जिताउन पनि खासै सक्रिय छैनन् । यसचोटि पहिला कृष्णहरिको नियतिको शिकार नन्दनहरि हुने खतरा बढेको छ । प्रकाश इचंगुनारायण र केशव रामकोटका बासिन्दा हुन् । उनीहरुले गरेको सहयोगका कारण कांग्रेसका मोहनले ०७४ मा ६ हजार ९ सय ६१ मतका साथ जितका थिए भने कृष्णहरिले ६ हजार ७ सय २६ मात्रै पाए ।
जग्गा दलालीको नाताले गाँसिएको सम्बन्धका कारण फेरि पनि एमालेलाई राजधानीभित्रै पु¥याउन लागेको क्षतिबारे पार्टीले उति चासो नदिइरहेको त्यहाँका कार्यकर्ता बताउँछन् । एक त, स्युचाटारकै कृष्णहरि कलम चिह्नबाट उठ्दा एमालेको भोट बाँडिदैछ, त्यसमाथि छिमेकी गाउँका कमरेडहरुको अन्तर्घात उत्तिकै चर्को छ । यो अन्तर्घातको श्रृंखलाले ०७४ मा उपमेयर जितेर अहिले फेरि त्यही पदमा उठेकी सुशीला अधिकारी मारमा पर्ने भएकी छन् । डिएसपी श्याम खत्रीकी पत्नी उनले ०७४ मा कांग्रेसकी कल्याणी खड्कालाई जम्मा ८० मतले जितेकी थिइन् । यसचोटि फेरि कल्याणीसँगै लड्दै छिन् ।
-दिनेश वडाल, सीतापाइला
टिप्पणीहरू