विद्यार्थीले अब वर्षभरि ३० दिन मात्र बिदा पाउने

शिक्षा, विज्ञान तथा प्रविधि मन्त्रालयले शैक्षिक सत्र व्यवस्थापन गर्न अधिकतम ३० दिन मात्र बिदा दिने भएको छ । सातामा दुई दिन बिदा दिने निर्णय गरेसँगै हिउँदे, वर्षे र अन्य बिदा कटौती गरी अधिकतम ३० दिन बिदा दिन लागिएको हो ।

विद्यालयले एकैपटक वा पटक पटक गरी बिदा दिन सक्नेछ । शिक्षा तथा मानव स्रोत विकास केन्द्रले सबै शिक्षा विकास तथा समन्वय इकाइलाई पत्राचार गरेर शिक्षण संस्थामा हुने क्रियाकलापलाई थप व्यवस्थित र प्रभावकारी बनाउनेतर्फ सहजीकरण गर्न आग्रह गरेको हो ।

केन्द्रले सबै विद्यालयमा एकरुपता ल्याउन साविकबमोजिम बिहान १० बजेदेखि अपरान्ह ४ बजेसम्म पठनपाठन सञ्चालन गर्न भनेको छ । त्यसैगरी, शुक्रबारको दिन पनि ४ बजेसम्म पठनपाठन गराउन भनिएको छ । यसअघि शुक्रबार १ बजेसम्म विद्यालय सञ्चालन हुन्थ्यो ।राष्ट्रिय पाठ्यक्रम प्रारुप–२०७६ ले निर्दिष्ट गरेबमोजिमको पाठ्यघण्टा र कार्यघण्टा नघट्ने गरी कक्षा सञ्चालन गर्न विद्यालयहरुलाई सुसूचितसमेत गराइएको छ । विद्यालयहरुले सोहीबमोजिम वार्षिक क्यालेण्डर तयार गरी कार्यान्वयनमा ल्याउनुपर्नेछ । गत सोमबारको मन्त्रीस्तरीय बैठकले उक्त निर्णय गरेको भनिएको छ ।