घुस खाने पुलिसका सई अख्तियारको फन्दामा

गण्डकी प्रदेश प्रहरी कार्यालयको विपद व्यवस्थापन गुल्म बाग्लुङमा कार्यरत प्रहरी नायव निरीक्षक (सई) रुपनारायण महत्तोमाथि घुस खाएको आरोपमा अदालतमा मुद्दा दायर भएको छ । अख्तियार दुरुपयोग अनुसन्धान आयोगले उनीविरुद्द ३८ हजार रुपैयाँ भ्रष्टाचार गरेको अभियोगमा आज विशेष अदालतमा मुद्दा दायर गरेको हो ।

महतोले आफ्नो कार्यक्षेत्र र जिम्मेवारी तथा कार्यरत कार्यालयको कार्य प्रकृतिभन्दा बाहिर गई पदीय हैसियतको दुरुपयोग गरी लेनदेनको मुद्दा मिलाइदिने भन्दै सेवाग्राहीसँग घुस लिँदालिँदै अख्तियारको टोलीले पक्राउ गरेको थियो । पक्राउपछि आवश्यक छानबिन गरि अख्तियारले मुद्दा चलाएको हो ।

उनलाई भ्रष्टाचार निवारण ऐन, २०५९ को दफा ३(१) बमोजिमको कसूरअन्तर्गत बिगो ३८ हजार रुपैयाँ कायम गरी सजायको मागदाबीसहित आज विशेष अदालतमा मुद्दा दर्ता गरेको आयोगका प्रवक्ता श्यामप्रसाद भण्डारीले जानकारी दिए ।