केपी ओलीलाई निमित्त नायक बनाएर गठबन्धन फुटाउने खेल भइरहेको दाबी
नेपाली काँग्रेसका वरिष्ठ नेता एवम् सत्तारुढ गठबन्धनको निर्वाचन तयारी तथा अनुगमन संयन्त्रका संयोजक रामचन्द्र पौडेलले नेपालमा प्रगतिशील र प्रतिगामी शक्तिबीच प्रतिस्पर्धा चलिरहेको बताउनुभएको छ । चुनावको मुखमा त्यस्तो प्रतिस्पर्धा उत्कर्षमा पुगेको पनि उहाँले बताउनुभयो ।
पाँच दलीय गठबन्धनले आज काठमाडौँमा आयोजना गरेको संयुक्त चुनावी सभालाई सम्बोधन गर्दै पौडेलले एमाले अध्यक्ष केपी शर्मा ओलीलाई निमित्त नायक बनाएर मुलुकलाई अस्थिरतातर्फ धकेल्ने प्रयासस्वरूप प्रतिगामी गठबन्धन बनेको दाबीसमेत गर्नुभयो । ओलीलाई शक्तिशाली बनाउन देशी–विदेशी शक्तिले सत्ता गठबन्धन टुटाउन खोजेको पनि उहाँको भनाइ छ ।
‘अहिले पाँच दलीय गठबन्धनलाई कमजोर बनाउने प्रयास भइरहेको छ । गठबन्धनलाई कमजोर बनाउनु भनेको अस्थिरतालाई साथ दिनु हो,’ पौडेलले भन्नुभयो, ‘प्रतिगामी शक्तिहरु एक ठाउँमा जम्मा हुँदैछन् । आज काँग्रेस र कम्युनिष्टको झगडा होइन । प्रतिगामी शक्तिविरुद्ध प्रगतिशील शक्ति एक ठाउँमा उभिएका हुन् । हामीले लोकतन्त्र जोगाउन लड्नु पर्छ ।’
राजनीतिक स्थिरता कायम गर्न पाँच दलीय गठबन्धन बनेको चर्चा गर्दै उहाँले स्थिरता नहुँदा विकास हुन नसकेको बताउनुभयो । ‘यो गठबन्धनको खिलाफमा केपी ओलीले पनि गठबन्धन गर्नु भएको छ । क–कसलाई लिएर गर्नु भएको छ, तीनको अनुहार पनि हेर्नुहोस्,’ नेता पौडेलले भन्नुभयो ।
टिप्पणीहरू