इँटा भट्टामा मान्छे पोल्ने पूर्वमन्त्रीलाई नछोड्न सर्वोच्चको आदेश

सर्वोच्च अदालतले रौतहट नरसंहारका अभियुक्त नेपाली कांग्रेसका निलम्बित सांसद तथा पूर्वमन्त्री अफताब आलमलाई थुनामुक्त नगर्न आदेश दिएको छ । न्यायाधीश सुष्मालता माथेमा र नहकुल सुवेदीको संयुक्त इजलासले आलमलाई थुनामै राख्न आदेश दिएको हो ।

आलमविरुद्ध विस्फोटक पदार्थ बमसमेतको प्रयोग गरी जिउँदै मान्छेलाई इँटा भट्टामा पोलेर मारेको अभियोग छ । पहिलो संविधानसभाका बेला २०६४ फागुन २७ गते आलमको घर नजिक बम बनाउने क्रममा बिस्फोट हुँदा ८ जना घाइते भएका थिए ।

घाइते सबैलाई नजिकैको इँटाभट्टामा जलाएको अभियोगमा रौतहट जिल्ला अदालतले आलमलाई पुर्पक्षका लागि थुनामा राख्न आदेश दिएको थियो । जिल्ला अदालतको आदेशलाई २४ माघ २०७६ मा उच्च अदालत वीरगञ्जले सदर गरेको थियो ।

आलमले उच्च अदालतको उक्त आदेशलाई चुनौती दिँदै सर्वोच्चमा रिट निवेदन दिएका थिए । रिटमा थुनाबाहिर बसेर मुद्दा लड्न पाउँ भन्ने माग गरिएको थियो । तर, सर्वोच्चले थुनामुक्त गर्दा पीडितमाथि अपूरणीय क्षति हुने भन्दै आलमको माग अस्वीकार गरेको हो ।