आज संक्रमित २० जना, निको हुने २७ जना

पछिल्लो २४ घण्टामा देशभर २० जना कोरोना संक्रमित भेटिएका छन् । स्वास्थ्य तथा जनसंख्या मन्त्रालयका अनुसार तीन हजार दुई सय २२ जनामा परीक्षण गर्दा उक्त संख्यामा संक्रमित पुष्टि भएको हो ।

सोही अवधिमा २७ जना संक्रमणमुक्त भएका छन् । हाल मुलुकभर कोरोना संक्रमण निको हुने दर ९८ दशमलव ८ प्रतिशत भने अझै दुई सय २१ जना सक्रिय संक्रमित छन् ।

गत २४ घण्टामा काठमाडौं उपत्यकामा १० जना नयाँ संक्रमित फेला परेका छन् । ललितपुरमा चार भेटिएका छन् भने भक्तपुरमा संक्रमित थपिएका छैनन् । काठमाडौंमा सक्रिय संक्रमितको संख्या ३७ रहेको छ । भक्तपुरमा चार र ललितपुरमा छ जना छन् ।

आज पनि संक्रमणका कारण कसैले ज्यान गुमाएका छैनन् । हालसम्म कोरोनाका कारण ११ हजार नौ सय ५१ जनाकोे ज्यान गएको छ ।