ओलीको नजरमा काठमाडौंका अरु सबै उम्मेदवार नालायक

नेकपा एमालेका अध्यक्ष केपी शर्मा ओलीले स्थानीय तहको निर्वाचनमा उठेका अन्य दलका उम्मेदवारहरु चर्चा गर्नसमेत लायक नरहेको टिप्पणी गर्नुभएको छ । उहाँले उम्मेदवार बन्ने इच्छा राख्नु अन्य दलका उम्मेदवारहरुको अधिकारको कुरा भए पनि उनीहरु चर्चा गर्न लायक नभएको बताउनुभएको हो ।

आज श्रमिक दिवसको अवसरमा राजधानीमा आयोजित कार्यक्रममा बोल्दै उहाँले अरु दलका उम्मेदवारको आवश्यकता नै नभएको उल्लेख गर्नुभएको छ । उहाँले भन्नुभयो, ‘कसैको उम्मेदवारीको बारेमा म केही भन्न चाहन्नँ ।

किनभने अरु उम्मेदवार चर्चा गर्न लायकका पनि छैनन् । केही कुरा गरिरहनु पर्ने आवश्यकता नै छैन । त्यसकारण म कसैको बारेमा केही भनिरहन चाहन्नँ । उहाँहरुको इच्छालाई सलाम गरौं । सूर्यमा भोट हालौँ । एमालेलाई जिताऔं,काठमाडौंलाई सफा गरौं ।’

काठमाडौंलाई विश्वकै नमूना राजधानी बनाउने र यहाँका नदीनालालाई पूर्ण सफा बनाउने संकल्प लिएकाले केशव स्थापितलाई एमालेले काठमाडौं महानगरपालिकाको मेयरमा उठाएको ओलीको दाबी छ ।