हत्यारालाई कारवाहीको माग गर्दै सीतापाइला चोक ठप्प, प्रदर्शनमा वडाध्यक्ष सहभागी
सडक किनारामा हिँडिरहेका पुरुषको बसको ठक्करबाट मृत्यु भएको विषयलाई लिएर आज राजधानीको सीतापाइला चोक अवरुद्ध बनाइएको छ । उक्त चोकमा हिजो हिडिँरहेका मानिसलाई बसले ठक्कर दिँदा ज्यान गएको भन्दै मृतकका आफन्तले सडक ठप्प पारेका हुन् ।
प्रहरीका अनुसार हिजो बिहान नागार्जुन नगरपालिका वडा नम्बर ४ का दुर्गाराज लौडारीको बसको ठक्करबाट मृत्यु भएको थियो । मृतक लौडारीको मृत्यु स्वाभाविक नरहेको त्यो हत्या भएको बताउँदै आज बिहान ९ बजेबाट सीतापाइला चोकबाट भीमढुङ्गातर्फ जाने सडकमा नाराबाजी समेत गरिएको थियो ।
झण्डै ६० जनाको संख्यामा जम्मा भएका मृतकका आफन्त तथा प्रदर्शनकारीहरुले सडक सुरक्षाको व्यवस्था गर, मान्छे मार्न पाईंदैन, हत्यारालाई कारवाही गर, शान्ति सुरक्षा कायम गरलगायत नारा लगाएका थिए ।
घटनास्थलमा मृतकका भाइ ठाकुरप्रसाद लौडारी, छोरा सन्तोष लौडारी, वडाध्यक्ष करुण कुमार बलामी, ज्वाईं शंकरनिधि पाण्डेलगायतको उपस्थिति थियो ।
प्रदर्शनमा सहभागी वडाध्यक्ष बलामीका अनुसार भीमढुंगा यातायात व्यवसाय समितिले क्षतिपूर्ति दिन आनकानी गरेको र बस सञ्चालकका तर्फबाट पनि कुनै प्रतिक्रिया नआएपछि सडक अवरुद्ध पारिएको हो ।
टिप्पणीहरू