१२ दिनपछि गभर्नरको कुर्सीमा बस्न पुगेका अधिकारी यसरी बैंक छिरे
नेपाल राष्ट्र बैंकका गभर्नर महाप्रसाद अधिकारी सर्वोच्च अदालतको अन्तरकालीन अन्तरिम आदेशपछि आज पद बहाली गर्न बिहान केन्द्रीय कार्यालय बालुवाटार पुगे ।
अधिकारीको स्वागतमा मूल गेटमा एमाले युनियनका कर्मचारी र भित्री ढोकामा निर्देशक र कार्यकारी निर्देशकहरु लाइन लागेर बसेका थिए । युनियनका पदाधिकारीहरुले माला र खादा लगाएपछि गभर्नरलाई उनीहरुले नै एस्कर्टिङ गरेर भित्र पुर्याएका थिए ।
भित्रको ढोकामा डेपुटीहरु र वरिष्ठ अधिकृतहरुले खादा र पुष्पगुच्छा दिएका थिए । हाकिमहरुले फूलको गुच्छा दिँदा युनियनका केही पदाधिकारीले, ‘हिजोसम्म खुच्चिंग भन्नेहरु आज सबैभन्दा ठूलो गुच्छा र धनुषटंकार भएर नमस्कार गर्दैछन्, लाज हराएकाहरु,’ भनेर कानेखुशी गर्दै थिए ।बैंकको तेस्रो तलामा रहेको गभर्नरको कार्यकक्षमा पुगेपछि अधिकारीलाई गत १२ दिनको हाजिरी गराइएको थियो । हाजिरी कापी बोकेर बैंक सञ्चालक समितिका सचिव तथा निर्देशक मुक्तिप्रसाद सापकोटा पुगेका थिए । नेपाली कागजमा बनाइएको हाजिरी पुस्तिकामा गभर्नरले शनिबार र सार्वजनिक बिदाको दिन बाहेकमा आएको र गएको हाजिर गरेका छन् ।
बैंकमा सबै कर्मचारीले विद्युतीय माध्यमबाट हाजिरी गरे पनि गभर्नर र डेपुटीहरुलाई उनीहरुका पिएले बिहान सबैभन्दा पहिले अघिल्लो दिनको घर गएको र त्यो दिन बिहान कार्यालय आएको हाजिरी गराउने प्रचलन छ । आज पनि अधिकारीले त्यसै गरेका हुन् ।हिजो अदालतको आदेशपछि गभर्नरको मुद्दाको पेशी बैशाख १३ गतेलाई तोकिएको छ । भोलिपल्ट बैंकको ६७ औं वार्षिकोत्सव परेको छ । त्यो दिन गभर्नरले समग्र बैंक तथा वित्तीय क्षेत्र र मौद्रिक अवस्थाको पछिल्लो विवरण प्रस्तुत गर्छन् । अर्थमन्त्री जनार्दन शर्मालाई मुखभरीको जवाफ सम्भवतः गभर्नरले १४ गतेको भाषणमा तथ्याङ्कमा दिने अनुमान गरिएको छ ।
टिप्पणीहरू