एमाले अध्यक्ष ओली नागार्जुन गएको दाबी

नेकपा एकीकृत समाजवादीका नेता तथा स्वास्थ्यमन्त्री बिरोध खतिवडाले प्रमुख प्रतिपक्षी दल नेकपा एमालेले राजावादी दलहरुसँग चुनावी गठबन्धनको गृहकार्य गरिरहेको बताउनुभएको छ ।

एमालेले राप्रपालगायतका राजावादी शक्तिसँग चुनावी गठबन्धन गर्ने ठोकुवा गर्दै उहाँले केपी ओलीले छलफल चलाइसकेको दाबीसमेत गर्नुभयो । ‘कम्युनिष्ट भएर पनि काँग्रेससँग गठबन्धन गर्यो भनेर माधव नेपाल र प्रचण्डलाई विभिन्न टिप्पणी गर्ने केपी ओली नागार्जुन (पूर्वराजा) र राप्रपासँग गठबन्धनका लागि धाइरहेका छन् । आगामी चुनावमा ओलीले पनि राजावादीसँग गठबन्धन गर्दैछन्, गरेनन् भने म दुइटै त भन्दिनँ मेरो एउटा कान चाहिँ काटेर फाल्दिन्छु,’ मन्त्री खतिवडाले भन्नुभयो ।

“राजावादीसँग गठबन्धन गर्दैछन्,गरेनन् भने म दुइटै त भन्दिनँ मेरो एउटा कानचाहिँ काटेर फाल्दिन्छु,’

केपी ओलीले अरुलाई एक्लै चुनाव लड्न चुनौती दिने गरेको तर ०७४ सालमा आफैँ माओवादी र राप्रपासँग मिलेर जितेको उहाँको भनाइ छ । ‘२०७४ मा केपी ओलीले एमाले, माओवादी,हृदयश त्रिपाठी, जनमोर्चा राप्रपाका लिङ्देनसँग मिले । त्यसमा नपुगेर सरकार बनाउँदा उपेन्द्र यादवलाई पनि थपे । अहिले तस्बिर यस्तो सिर्जना गर्न खोजिएको छ कि,केपी ओली आफूमात्र महामहिम, एक्लै एक्लै रथ हाँकेर हिँडेजस्तो । यो सरासर फटाहा कुरो हो,’ मन्त्री खतिवडाले भन्नुभयो ।

उहाँले एमालेसँग एकीकृत समाजवादीमात्र नभई अहिलेको पाँच दलीय गठबन्धनका कुनै पनि दलले सहकार्य नगर्ने दाबी पनि गर्नुभयो । काँग्रेससँग चुनावी गठबन्धन नभएमा जनमोर्चा, माओवादी, नेकपा एकीकृत समाजवादीलगायतका दलहरुबीच वाम गठबन्धन हुन सक्ने उहाँको भनाइ छ ।

‘सक्दाखेरि गठबन्धन गरेको राम्रो, तर सबै स्थानीय तहमा सकिन्न । उपमहानगर र महानगरमा भने गठबन्धन गरेर जाँदा सहज हुन सक्छ’, खतिवडाले भन्नुभयो ।