अमेरिकाकाे इमेलपछि सरकार ढलेको एमाले अध्यक्षकाे दाबी
नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले आफू नेतृत्वको सरकार ढाल्ने न्यायाधीशलाई अमेरिकाबाट इमेल आएको दाबी गर्नुभएको छ ।
एमालेका पत्रकारहरुको संगठन प्रेस चौतारी नेपालको नवौं राष्ट्रिय महाधिवेशनको आज पोखरामा उद्घाटन गर्दै ओलीले न्यायमूर्तिमाथि सरकार ढालेको गम्भीर आरोप लगाउनुभएको हो ।
उहाँले भन्नुभयो, ‘एकजना न्यायाधीशको अभिव्यक्ति हुन्छ, एउटा इमेल आउँछ । अमेरिकाबाटै इमेल आउँछ । केपी ओलीको सरकार ढाल्नु नै थियो । नढाली भएको थिएन, किन ? न्यायाधीशको के बिगारिदिएको थियो त्यो सरकारले ?’
ओलीले वर्गीय पूर्वाग्रह र विकास विरोधीको षड्यन्त्रको हिस्सेदार भएर न्यायाधीशहरुले आफू नेतृत्वको सरकार ढालेको आरोप लगाउनुभयो ।
संविधान बाहिर गएर सरकार ढालेको भन्दै उहाँले अदालतले सरकार बनाउने गलत अभ्यास शुरु भएको पनि बताउनु भयो । ‘संविधान बाहिर गएर सरकार ढालियो,’ ओलीले भन्नुभयो, ‘संविधान बाहिर गएर जननिर्वाचित प्रगतिशील सरकारलाई ढालेका छौँ । संसदले सरकार बनाउने र भत्काउने गर्छ । संसद र जनप्रतिनिधिको काम हो । अदालतको होइन । तर, नेपालमा, एकपल्ट एकजनाले भनेका थिए, गोरु ब्याउँदैन भन्थे, सर्वोच्च अदालतमा गोरु ब्यायो, । अहिले गोरु ब्यायो मात्र होइन, पाँचवटा बाच्छा पायो ।’
टिप्पणीहरू