माधव नेपालद्वारा खादा लगाएर पार्टीमा स्वागत

नेपाल कम्युनिष्ट पार्टी (एकीकृत समाजवादी) का अध्यक्ष माधव नेपालले नेपाली राजनीतिमा एकीकृत समाजवादी पार्टीको विशिष्ट भूमिका रहेको बताउनु भएको छ । महोत्तरीबाट एकीकृत समाजवादीमा प्रवेश गर्नेहरुलाई स्वागत गर्दै
पूर्व प्रधानमन्त्री नेपालले जनताको हित र कल्याणको निम्ति समाजवादको यात्रामा निरन्तर र प्रतिवध्दताका साथ लागि परेको बताउनु भयो ।

आफूहरुले निर्माण गरेको पार्टी दक्षिणपन्थी अवसरवादी भासमा जकडिएपछि सुध्रने लक्षण नदेखेर कम्युनिष्ट आन्दोलनको निरन्तरतास्वरुप विद्रोह गर्नुपरेको भन्दै राष्ट्रिय राजनीतिमा आफ्नो पार्टीले तरंग पैदा गरेको बताउनुभयो । उहाँले एमसीसीसंग विभिन्न आशंका कायमै भएको भन्दै अहिलेको अवस्थामा एमसिसी अगाडि बढाउन नसकिने बताउनु भयो । नेपाललाई कुनै पनि नाममा रणभूमि बनाउन नचाहने भन्दै अध्यक्ष नेपालले आफूहरुले असंलग्न परराष्ट्र नीति अवलम्वन गर्ने बताउनु भयो ।

बर्तमान गठवन्धन आगामी ३ वटै निर्वाचनमा मिलेर जाने भन्नेवारेमा पटक पटक कुराकानी भएको भन्दै नेता नेपालले प्रतिगामीहरुको विरुध्दमा मोर्चावन्दी हुने र त्यस्तो मोर्चावन्दी केहि दिनअगाडि भएको राष्ट्रिय सभा निर्वाचनले लक्षित गरिसकेको भन्दै त्यसकोलागि सम्पूर्ण नेता तथा कार्यकर्ताहरुलाई उत्साहका साथ आ-आफ्नो कार्यक्षेत्रमा लाग्न निर्देशन दिनुभयो ।

पार्टीको केन्द्रीय कार्यालयमा एक छिनअघि नेकपा एमाले मधेश प्रदेश कमिटी सदस्य नरबहादुर स्याङतान,नेकपा एमाले नेता तेजप्रसाद अधिकारी,सुवर्णप्रसाद पौडेल र जसपाका नेता जयकुमार झालाई टीका र खादा लगाई स्वागत गरिएको थियो ।