एक तारे जर्नेललाई जिम्मा लाएर दुई तारे जर्साब हिँडे घरतिर

नेपाली सेनाका उपरथी अनन्त कार्की आफ्नो जिम्मेवारी बुझाएर भर्खरै सैनिक जिम्मेवारीबाट बाहिरिएका छन् । सैनिक मुख्यालय पश्चिमको जैसिदेवल नजिकै रहेको सेन्ट्रल जेलको आडमा रहेको प्रस्तावित नेशनल डिफेन्स युनिभर्सिटी (एनडीयु) को अफिसबाट उनी निस्किएका हुन् ।

आफ्नो जिम्मेवारी कार्यालयका सहायक रथी भोला थापालाई हस्तान्तरण गरेपछि कार्की बिदामा बस्ने भन्दै भक्तपुर घरतिर लागेका छन् । बिहान मलिन अनुहार लिएर कार्यालय पुगेका कार्कीले एक शब्द पनि नबोलेर बुझबुझारथको फाइलमा सुईं सुईं हस्ताक्षर गरेको स्रोतले बताएको छ ।

अन्तमा ‘ल म हिँडे’ भनेका उनले बुझबुझारथको प्रक्रिया अवधिभर मुखमा मास्क लगाउँदै निन्याउरो अनुहार बनाएका थिए । ‘सँधै हाक्कहुक्क गर्ने जर्साब आज नुन खाएको कुखुरा जस्तो पो देखिनुभएको थियो,’ एनडीयुका एक जना सैनिकको मूल्यांकन हो यो ।

“आफ्नो जिम्मेवारी कार्यालयका सहायक रथी भोला थापालाई हस्तान्तरण गरेपछि कार्की बिदामा बस्ने भन्दै भक्तपुरको घरतिर लागेका छन् । कार्कीले एक शब्द पनि नबोलेर बुझबुझारथको फाइलमा सुईं सुईं हस्ताक्षर गरेको स्रोतले बताएको छ ।”

आफ्नो म्याद थप्न प्रधानमन्त्री कार्यालय र शीतल निवासमा समेत उजुर गरेपछि कार्की सर्वाधिक विवादमा तानिएका थिए । तर उनको म्याद नथप्ने निर्णय क्याबिनेटले एक साता अगावै गरेपछि उनी रनभुल्लमा परेका हुन् । कार्कीले प्रधान सेनापति प्रभुराम शर्माले आफूलाई म्याद नथप्न खोजेको भन्दै रक्षा मन्त्री तथा प्रधानमन्त्री शेरबहादुर देउवा र सेनाको परमाधिपति तथा राष्ट्रपतिसमक्ष उजुर गरेका थिए ।

क्याबिनेटले गत पुस ३० गतेको मितिमै कार्कीको म्याद नथप्ने निर्णय गरेको पत्र सैनिक मुख्यालयमा पुगेपछि उनी छानाबाट खसेझैँ भएका हुन् । कार्कीसँगै म्याद सकिन लागेका उपरथी सीताराम खड्का र ताराध्वज पाण्डेको भने सैनिक मुख्यालयको सिफारिसबमोजिम थपिएको छ ।

कार्कीले पटक पटक सेनामा चेन अफ कमाण्ड उल्लंघन गरेका थिए । पूर्ववर्ती प्रधानसेनापतिको फेरो समाएर उनले धेरै वटा गलत कार्य गरेपछि अहिले म्याद नथप्न उनीविरुद्ध सबै लागेका हुन् । बहालरत उपरथी कार्कीले सेनाको प्रचलित मापदण्ड र अनुशासन उल्लंघन गरेर प्रधानसेनापतिविरुद्ध लिखित उजुरी नै हालेपछि घटनाक्रमले नयाँ रुप लिएको हो ।

सैनिक ऐनमा सैनिक अधिकृतहरुको म्याद थप्न गर्ने वा नगर्ने भन्ने अधिकार सेनापतिलाई मात्र छ । कार्कीले प्रधानमन्त्री गुहार्ने र मिडियामा गएर च्यालेञ्ज गरेपछि सैन्य नेतृत्व गम्भीर बनेर कारवाहीको प्रक्रिया अघि बढाएको थियो ।

तर, कारवाही भोग्न भन्दा घर जान ठीक भन्दै उनले प्रधान सेनापति शर्मासमक्ष गल्ती स्वीकारेपछि बुझबुझारथ गरेर बिदामा बस्ने,कतै उजुर नगर्ने सहमतिमा उनले आज कार्यालय पुगेर बुझबुझारथ गरेका हुन् ।