सुर्खेतका सेना मान्छे जोगाउनमा सकृय

उमेर विवादमा अदालत गुहार्दै रहेका पूर्व अपरेशन प्रमुख (डिजिएमओ) प्रेम शाही नेतृत्वको सुर्खेतस्थित सैन्री पश्चिम कमाण्डद्वारा सञ्चालित हवाई सेवाले सो क्षेत्रका धेरै सर्वसाधारणको ज्यान जोगाएको छ । पछिल्लो समय पश्चिम कमाण्डअन्तर्गत सुर्खेतको वीरेन्द्रनगरबाट हवाई सेवा शुरु गरेपछि धेरैलाई अकालबाट जोगाएको हो ।

कमाण्डले कर्णाली,सुदूरपश्चिम र लुम्बिनीका दुई जिल्लामा हवाई सेवा उपलब्ध गराउँदै आएको हो । सुत्केरी तथा प्रकृतिक प्रकोप र विपद्मा परेका सर्वसाधारणलाई उक्त कमान्डअन्तर्गत हवाई सेवामार्फत उध्दार गरेर उपचारको निम्ति सुविधासम्पन्न ठाउँमा पुर्याउँदै आएको छ ।

सेनाले २०७६ भदौ १७ गतेदेखि वीरेन्द्रनगरमा पश्चिम हवाई सेवा स्थापना गरी उध्दार कार्यलाई प्रभावकारी बनाउन थालेको हो । शुरुमा काठमाडौँबाट हुने उडानहरु २०७६ भदौ १७ देखि सुर्खेतबाट नै तीन वटा प्रदेशमा हुँदै आएको छ ।

तीन वटा प्रदेशलाई जोडेर सेनाले पश्चिम कमाण्ड स्थापना गरेको हो । लुम्बिनीको बाँके,बर्दिया, सुदूरपश्चिम र कर्णालीको पूरै भागलाई समेटेर पश्चिम एअर बेसबाट उडान हुँदै आएको छ ।

उध्दारका लागि तीन वटा हेलिकप्टर र उडान दल सँधै तयारी हालतमा राखिएको पश्चिम कमाण्डका प्राविधिक प्रमुख सेनानी रचन श्रेष्ठले जानकारी दिनुभयो ।

यो वर्ष मात्र गर्भवती र सुत्केरी गरी हालसम्म ४८ जनाको उध्दार गरिएको छ । २७ वटा अन्य उध्दारका काम पनि भएको पश्चिम कमाण्डले बताएको छ ।

अघिल्लो वर्ष ३४ गर्भवती,अन्य २३ र २०७६ मा ३५ गर्भवती र अन्य १९ जनाको उद्धार गरिएको प्रमुख सेनानी श्रेष्ठले बताउनुभयो ।