महासंघ छाडेर बाहिरिएकी बाला बैठकमा बसेपछि बबाल « Jana Aastha News Online
Logo
८ माघ २०७८, शनिबार
|  Sat Jan 22 2022
Logo
८ माघ २०७८, शनिबार
|  Sat Jan 22 2022

महासंघ छाडेर बाहिरिएकी बाला बैठकमा बसेपछि बबाल

प्रकाशित मिति :  ३० पुष २०७८, शुक्रबार १४:१५


पार्टी राजनीतिमा सक्रिय हुने भन्दै नेपाल पत्रकार महासंघको उपाध्यक्ष पदबाट राजीनामा दिएकी बाला अधिकारी महासंघको केन्द्रीय समिति बैठकमा सहभागी भएपछि लफडा भएको छ । अधिकारीको सहभागितालाई लिएर केन्द्रीय सदस्यहरुले चर्को असन्तुष्टि जनाएका कारण केहीबेर बैठक नै अवरुद्ध भएको हो ।

कपिलवस्तुको तिलौराकोटमा आज बिहानबाट सुरु भएको बैठकको शुरुमै केही केन्द्रीय सदस्यले राजीनामा दिएर हिँडेकी अधिकारीको उपस्थितिलाई लिएर प्रश्न उठाएका थिए । उनी कुन हैसियतमा बैठकमा आएको ? भन्दै सदस्यहरुले कडिकडाउ कुरा उठाएपछि बैठक केहीबेर भाँडिएको थियो ।

महासंघको विधानले राजनीतिक दलका कार्यकर्ता महासंघको सदस्य हुन नपाउने व्यवस्था गरेको छ । विधानको सोही व्यवस्थाका कारण काँग्रेस महाधिवेशनको पूर्वसन्ध्यामा अधिकारीले महासंघको जिम्मेवारी छाडेर आफू पार्टी राजनीतिमा आवद्ध हुने घोषणा गरेकी थिइन् ।

महाधिवेशन प्रतिनिधिसमेत रहेकी उनी केन्द्रीय सदस्यमा उम्मेदवार बन्ने चर्चा पनि थियो । तर, उनी केन्द्रीय सदस्य भने बनिनन् । राजीनामा दिँदा अधिकारीले महासंघको विधान र आचारसंहिता पालना गर्नु आफ्नो प्रमुख कर्तव्य हुने कुरा हेक्का रहेको उल्लेखसमेत गरेकी थिइन् ।यसअघि प्रदेश समिति तथा जिल्ला, शाखाका केही सदस्यले पार्टी प्रतिनिधि बनेपछि महासंघबाट राजीनामा दिएका थिए । केन्द्रीय महासचिव रोशन पुरीले पनि पार्टीको प्रचार विभाग सदस्य पद अस्वीकार गरेका थिए ।

तर, राजीनमा दिएर काँग्रेसको १४ औँ महाधिवेशनमा प्रतिनिधि बनेकी अधिकारी आज टुप्लुक्क बैठकमा पुगेपछि सदस्यहरुले प्रश्न उठाएका हुन् । उनी कुन हैसियतका साथ आजको बैठकमा उपस्थित भएको भन्नेबारे कुरा उठेको केन्द्रीय सदस्य सुनिल खड्काले बताए ।

यता, महासंघका अध्यक्ष विपुल पोखरेलको कार्यशैलीमाथि पनि प्रश्न उठेको छ । खड्काका अनुसार विवादास्पद मिडिया अवार्डमा पोखरेलको नाम जोडिएकोबारे सदस्यहरुले छानबिनको माग गरेका छन् । मिडिया अवार्डका नाममा अध्यक्षले ठगीधन्दा चलाएको भन्दै अधिकांश केन्द्रीय सदस्यले उनको अध्यक्षतामा बैठक बस्न नसक्ने अडान लिएका थिए ।

प्रेस सेन्टर र समाजवादी प्रेस संगठनबाट महासंघमा प्रतिनिधित्व गर्ने सबै सदस्यले पोखरेलको अध्यक्षतामा बस्ने बैठक अस्वीकार गर्ने चेतावनी दिएपछि पदाधिकारीहरुले अलग्गै छलफल गरेका थिए । त्यसपछि असन्तुष्ट पक्षसँग १० बुँदे सहमति गरेर अहिले बैठक सुचारु गरिएको छ ।

अहिले बैठक सुचारु भएको केन्द्रीय सदस्य खड्काले जानकारी दिए । उनका अनुसार कमजोरी सच्याउने प्रतिबद्धता अध्यक्षबाट आएपछि असन्तुष्ट खेमा उनकै अध्यक्षतामा बैठक बस्न तयार भएको हो ।


प्रतिक्रिया दिनुहोस !