सुनकाण्डवाला गोरेका भाइ विमानस्थलबाटै समातिए

हाल ज्यान मुध्दाअन्तर्गत बिराटनगर कारागारमा रहेका बहुचर्चित ३३ किलो सुन प्रकरणका भरिया नाइके चुडामणि उप्रेती ‘गोरे’ का भाइ रमेशलाई प्रहरीले त्रिभुवन अन्तर्राष्ट्रिय विमानस्थलबाट नियन्त्रणमा लिएको छ । सुन काण्ड र सनम शाक्य हत्याको मुख्य योजनाकार मानिएका उनलाई दुबईबाट काठमाडौं ल्याउने क्रममा नेपाल प्रहरीले विमानस्थलमा पक्रेको हो ।

उनले पछिल्लो २०७२ सालदेखि दुबईमा बसेर ४ सय २१ पटकमा ३ हजार ८ सय केजी अवैध सुन नेपाल भित्र्याएको प्रहरीको दाबी छ । इन्टरपोलको सूचनाको आधारमा उनी तीन वर्षदेखि दुबई प्रहरीको हिरासतमा थिए । उनी दुबई होटल व्यवसायीको रुपमा परिचित भएर सुन ओसार्ने कार्यमा संलग्न भएको प्रहरीको अनुसन्धानबाट खुलेको छ ।

अवैध तरिकाले दुबईबाट पठाइएको सुनमध्ये हराएको ३३ किलो सुन काण्डमा सनम शाक्य मारिएपछि रमेशको संलग्नता पुष्टि भएको हो ।