एमसीसी विरुद्धको प्रदर्शन संसद भवनको दैलोमै
अमेरिकी मिलेनियम च्यालेञ्ज कर्पोरेशन (एमसीसी) सम्झौता खारेजीको माग गर्दै आन्दोलन गरिरहेको नेपाल मजदुर किसान पार्टीले आज संघीय संसद भवन अगाडि प्रदर्शन गरेको छ ।
नयाँ बानेश्वरको तीनवटा चोकबाट र्यालीसहित निस्किएका सो पार्टीका कार्यकर्ताहरुले संसद भवन अगाडिको पानी ट्यांकी नजिकै जम्मा भएर एमसीसीविरुद्ध प्रदर्शन गरेका हुन् ।
त्यसअघि पुरानो बानेश्वर चोकमा भेला भएका प्रदर्शनकारीहरु नाराबाजी गर्दै पानीट्यांकी अगाडि मिसिएका थिए । नेमकिपाका केन्द्रीय सदस्य राजवीर डंगोलको नेतृत्वमा झण्डै पाँच सयको संख्यामा रहेका प्रदर्शनकारीहरुले एमसीसीविरुद्ध चर्को नाराबाजी गर्नुका साथै ब्यानर र प्लेकार्ड बोकेका थिए ।
सो क्रममा प्रदर्शनकारीहरुले ‘एमसीसी सम्झौता खारेज गर’, ’अमेरिकी हस्तक्षेप मूर्दावाद’, अमेरिकी विस्तारवाद मूर्दावाद’, ‘राष्ट्रघाती सम्झौता फिर्ता गर’, भारतीय विस्तारवाद मूर्दावाद’, ’सरकार र सांसदहरु होसियार’, ’देशभक्त नागरिक एक हौँ’ जस्ता नारा लगाएका थिए ।
र्यालीपछि आयोजित कोणसभालाई सम्बोधन गर्दै नेमकिपाका केन्द्रीय सदस्य सुरेन्द्रराज गोसाईंले देशलाई अमेरिका र भारतको उपनिवेश बनाउने योजनाअनुरुप एमसीसी संसदमा लगिएको दाबी गर्दै कुनै हालतमा पास गर्न नदिने चेतावनी दिएका छन् ।
प्रधानमन्त्री शेरबहादुर देउवालाई एमसीसीमा कहाँ राष्ट्रघात छ भन्ने देखाउनका लागि आफूहरु सडकमा आउन बाध्य भएको पनि उनले बताए । प्रधानमन्त्रीले केही दिनअघि माओवादी केन्द्रको महाधिवेशनमा एमसीसी नेपालको हितमा रहेको भन्दै कहाँ राष्ट्रघात छ ? भनि प्रश्न गरेका थिए ।
प्रमुख प्रतिपक्ष दलका नेता केपी ओलीसमेत एमसीसीको पक्षमा रहेको भन्दै गोसाईले बहसमा आउन निम्तो दिएका छन् । एमसीसीमा कहाँ–कहाँ राष्ट्रघात छ भन्ने बुझ्न आफ्नो पार्टीका सामान्य कार्यकर्तासँग छलफल गर्न उनले ओली र देउवालाई कटाक्षपूर्ण आग्रह गरे ।
विरोधसभालाई नेमकिपाकी केन्द्रीय सदस्य अनुराधा थापा मगर, कृष्णकुमार वैद्यलगायत नेताहरुले सम्बोधन गरेका थिए ।
टिप्पणीहरू