पत्रकारहरुलाई कथा सुनाउँदै प्रचण्डले भन्नुभयो– अब गर्जिने हो
नेकपा (माओवादी केन्द्र) का अध्यक्ष पुष्पकमल दाहाल प्रचण्डले पार्टीलाई २०६४ सालकै अवस्थामा फर्काउने दाबी गर्नुभएको छ । पार्टीको राष्ट्रिय सम्मेलनको पूर्वसन्ध्यामा आज सञ्चारमाध्यमका सम्पादकहरुसँग छलफल गर्दै उहाँले माओवादीलाई बलियो बनाएर परिवर्तनका एजेण्डाको रक्षा गरिने बताउनुभएको हो ।
अध्यक्ष प्रचण्डले मुलुकमा अहिले पनि प्रतिगमनको खतरा कायमै रहेकाले माओवादी पार्टी बलियो हुनुपर्ने पनि बताउनुभयो । माओवादीकै नेतृत्वमा गणतन्त्र, संघीयता, धर्मनिरपेक्षता, समावेशी समानुपातिक प्रतिनिधित्वजस्ता अग्रगामी परिवर्तन भएकाले त्यसको रक्षा र विकासका लागि माओवादी बलियो हुनुपर्ने उहाँको भनाइ छ।
शान्ति प्रक्रियामा आएसँगै माओवादी पार्टी बिग्रन शुरु भएको पनि स्वीकार गर्नुभयो ।
‘दुई पटकसम्म संसद विघटन गरेर यो परिवर्तन उल्ट्याउने कोसिस भयो । तर, हामीले त्यसका विरुद्ध लाखौँ जनता सडकमा उतारेर उनीहरुको प्रयास सफल हुन् दिएनौं,’ प्रचण्डले भन्नुभयो, ‘अहिले पनि यो परिवर्तन उल्त्याउन पर्छ भन्नेहरु चुप लागेर बसेका छैनन् । त्यसबारे पनि हामी राष्ट्रिय सम्मेलनमा गम्भीर ढंगले छलफल गर्छौँ ।’
प्रचण्डले शान्ति प्रक्रियामा आएसँगै माओवादी पार्टी बिग्रन शुरु भएको पनि स्वीकार गर्नुभयो । क्रान्तिकारी रुपान्तरण गरेर मुलुकलाई नयाँ दिशा दिन राष्ट्रिय सम्मेलनले नयाँ बिचारको विकास गर्ने पनि उहाँको दाबी छ ।
सिंह र भेडाको कथा सुनाउँदै उहाँले भन्नुभयो, ‘भेडाको बथानमा मिसिएर हामी पनि भेडाजस्तै भएका थियौँ, अब सिंह बनेर गर्जिंछौँ, हेर्नुहोला ।’
टिप्पणीहरू