ओलम्पिक बहिष्कार गर्ने अमेरिकी धम्कीको रुसद्वारा निन्दा

रुसी राष्ट्रपति भ्लादिमिर पुटिनले आगामी २०२२ को बेइजिङ शीतकालीन ओलम्पिक बहिष्कार गर्ने अमेरिकी धम्कीको कडा शब्दमा निन्दा गर्नुभएको छ ।

पुटिनले आफ्नो मुलुक रुसले खेलकुदमा गरिने राजनीतिकरणको सँधै विरोध गरेको बताउँदै आगामी शीतकालीन ओलम्पिकलाई बहिष्कार गर्न लागेको अमेरिकाको कूटनीतिक भाषामा कडा प्रतिवाद गर्नुभएको हो ।

मस्कोमा आयोजित पत्रकार सम्मेलनमा सोधिएका प्रश्नको जवाफ दिँदै राष्ट्रपतिले अमेरिकाले चिनियाँ विकासको गति रोक्ने अभिप्रायले ओलम्पिकको तथाकथित ‘कूटनीतिक बहिष्कार’ गर्नु ‘सर्वथा अस्वीकार्य र गलत’ रहेको प्रतिक्रिया दिनुभएको छ ।

राष्ट्रपति पुटिनले अमेरिकाले खेलकुदमा राजनीतिलाई जबर्जस्ती तानेर चीनलाई विश्वव्यापी प्रतिस्पर्धीको रूपमा माथि जानबाट रोक्ने उद्देश्य राखेको आरोप लगाउनुभएको छ ।

उहाँले भन्नुभयो,‘अमेरिकी निर्णय अस्वीकार्य र गलत छ । मैले एक पूर्व अमेरिकी राष्ट्रपतिसँग कुरा गर्दा उनले यसअघि लसएन्जलस् र मस्कोमा भएका ओलम्पिक खेलकुद बहिष्कार गर्नु ठूलो गल्ती भएको स्वीकारेका थिए । अमेरिकाले अहिले फेरि त्यहि गल्ती दोहोर्याउँदै छ । त्यसको ठ्याक्कै कारण के हो ? यो चीनको आर्थिक बृध्दि र समृध्दिलाई रोक्ने असफल प्रयास मात्रै हो ।’

यसअघि शीतयुध्दताका सन् १९८४ मा भएको लसएन्जलस् ओलम्पिक रुस र रुसनिकट मुलुकहरुले बहिष्कार गरेका थिए । त्यस्तै सन् १९८० मस्कोमा भएको ओलम्पिक पनि अमेरिका र ऊनिकट मुलुकहरुले बहिष्कार गरेका थिए । त्यतिबेला विश्व शीतयुध्दको उत्कर्षमा पुगेको थियो ।

https://l.facebook.com/l.php?u=https%3A%2F%2Fv.xinhua-news.com%2Fstatic%2Fview%3Fdest%3DvKMDEkJnhoczkyISstMTY0MDMxNTkzMzk1Ni0vZHNwX0FWL2F2Y192aWRlby8yMDIxMTIvMjMvM2I2MGY1YzBiZGJmNDcxMDkxYjAyY2NlMjQzMDJlNjZfMjA0OGtfTC5tcDXqQ%253D%26fbclid%3DIwAR3Z1lKsNeBT-0zvINPk4hT_39sb2qrGOEUp4AMoJJP9XSufbawc5eM0iBg&h=AT3M0nkHVrNwB_NELGolOwHcNbR08FllCRb9m3NHHNSZRXU2QgN5MR6OI1xce7QCJ4tgSx8VqvkKo3w3EQ9eBJnlOeuI-rXkIAISlgjpTQD7tMMeHuzteABiRQY46qt2vDU

स्रोतः सिन्ह्वा