श्रीमतीको उपचार खर्च बोकेर श्रीमान फरार

नुवाकोट ककनी–५ की अनिता ११ पटक गोडाको अपरेशन गरेपछि उठेको अस्तालको बिल तिर्न नसक्दा सुष्मा कोइराला मेमोरियल अस्पताल साँखुबाट घर जान सकेकी छैनन् । ११ पटकसम्म अप्रेशन भयो भन्दा कतिले पत्याउन पनि छाडिसकेका छन् । पत्याउने दिनसम्म उनले आर्थिक सहयोग पनि मागिनन् ।

धानको भारी बोक्न जाँदा गोडामा केही बिजेको अनुभव भयो । बिस्तारै घाउ रातो भयो । एक दिन,दुई दिन गर्दै घाउ पाक्न थालेपछि असहज भएको थियो ।

सानो छेस्को पसेर शुरु भएको त्यही घाउले यति ठूलो आकार लिन्छ भन्ने अनिता तामाङले कल्पनासम्म गरिनन् । त्यही छेस्कोकै कारण गोडाका चारवटा औंला गुमाइसकेकी छन् । तर पनि सुख छैन । डाक्टरले ११ पटक त अप्रशेन नै गरिसके । निको हुने लक्षण छैन ।

अनिताले औंला त गुमाइन् नै । अस्पतालको उपचार खर्चको निम्ति रकम जुटाउन नसकेर अर्को सकस ब्यहोर्दैछिन् । झण्डै तीन लाख रुपैयाँ तिर्न बाँकी छ । त्यसैले घर जाने मन हुँदाहुँदै पनि अस्पतालमै रोकिन बाध्य छिन् ।

“सुख दुःखमा साथ दिने बाचा खाएर सात फेरा लगाएका श्रीमानले पनि यो दुःखमा साथ दिएनन् । बरु आफन्तीले सहयोगका लागि उठाएको रकम पोको पारेर भागे । भाग्यले नि गरिबलाई नै ठग्ने रहेछ ।”

‘अब त ऋण पनि कसैले दिँदैनन्, चानचुन फार्मेसी र क्याण्टिन गरेर साढे तीन लाख तिर्न बाँकी छ । यो सबै चुक्ता नगरी घर जान मिल्दैन ।’ लामो सुुस्केरा तान्दै भनिन् । भन्छिन्, ‘सम्झ्यो भने त्यसै मन भक्कानिन थाल्छ । सुख दुःखमा साथ दिने बाचा खाएर सात फेरा लगाएका श्रीमानले पनि यो दुःखमा साथ दिएनन् । बरु आफन्तीले सहयोगका लागि उठाएको रकम पोको पारेर भागे । भाग्यले नि गरिबलाई नै ठग्ने रहेछ ।’

मलिन अनुहारमा भेटिएकी उनले ’पैसा तिरेर घर जानु भनेको छ अस्पतालले । ड्रेसिङ गर्न मात्र आउनु भनेको छ । घर जानलाई पैसा कसरी तिर्ने होला,सम्झेरै श्वास रोकिन खोज्छ,’ लामो सास तान्दै भनिन् ।

अनिताका अनुसार हिजोआज फार्मेसी र क्याण्टिनले पनि उधारो भनेपछि मुख बिगार्न थालेका छन् । अस्पतालमा उनको हेरचाहका लागि ८ वर्षे छोरा कुरेर बसेका छन् । सहयोग कतैबाट जुट्छ कि भनी छाडेर हिँडेका श्रीमानलाई अनिताले फोन गर्न लगाइन्, छोरालाई । तर श्रीमानले उल्टै अपशब्द बोलेर फोन राखिदिएपछि उनी थप खिन्न भएकी छन् ।

अचेल अनिता र छोरा अनिशको दैनिकी अस्पतालमा रोएरै बितिरहेको छ । श्रीमानले उपचारका लागि भनेर सासू–ससुरा र नन्दले दिएको ५० हजार पनि खाएर भागेको उनले बताइन् । अगाडि भनिन्, ‘कोही त होलान् नि सहयोग गर्नेहरु ! भन्दिनुस् न है ! म यो गुन कहिल्यै बिर्सनै छैन ।’