काँग्रेसको अन्तिम परिणाम भोलि साँझसम्म आउने, १३ ठाउँमा ट्याङ्की घोप्ट्याइयो

नेपाली काँग्रेसको १४ औं महाधिवेशनमा भएको निर्वाचनको अन्तिम परिणाम भोलि साँझसम्म आउने जानकारी दिइएको छ । सबै पदाधिकारी र केही क्लस्टरको परिणामपछि अहिले केन्द्रीय सदस्य (खुल्ला) को मत गणना भइरहेको छ ।

केन्द्रीय सदस्यअन्तर्गत प्रदेश नम्बर २ को खुल्ला महिलातर्फ एक सिटको लागि भएको मतगणनाको अन्तिम परिणामअनुसार चित्रलेखा यादव विजयी भएकी छन् । उनले २७ सय ३१ मत प्राप्त गरेकी छन् । खसेको ४६ सय ३६ मतमध्ये गीता चौधरीले १८ सय ८५ मत प्राप्त गरेकी छन् । उक्त क्लस्टरमा २० मत बदर भएको छ ।

काँग्रेस केन्द्रीय कार्यालयमा भइरहेको मतगणनामा १३ ठाउँमा मतपेटिका घोप्ट्याइएको छ । शनिबार अपरान्हसम्म केन्द्रीय सदस्यमा सबैभन्दा अगाडि शशांक कोइराला छन् भने त्यसपछि गृहमन्त्री बालकृष्ण खाँणको मत देखिएको छ ।

प्रारम्भिक मतपरिणाममा सञ्चारमन्त्री ज्ञानेन्द्रबहादुर कार्की, बलबहादुर केसी, अर्जुननरसिंह केसी त्यसपछि देखिएका छन् । राप्रपा छाडेर काँग्रेस छिरेका स्वर्गीय प्रधानमन्त्री सूर्यबहादुर थापा पनि अरुभन्दा अगाडि नै रहेको प्रारम्भिक मत परिणामले देखाएको छ ।

विजय गच्छदारसँगै काँग्रेस छिरेका काभ्रेका डन गणेश लामाले पनि अरुलाई पछाडि पारेको देखिन्छ । गच्छदारसँगै आएका मंगल थारु, गोपाल दहितको मत पनि राम्रै देखिएको काँग्रेस केन्द्रीय कार्यालयमा जानकारी गराइएको छ ।

जिपछिरिङ लामा, एनपी साउद, रमेश लेखक, रामशरण महत, मोहनकुमार बस्नेतलगायतका पूराना नेताहरुको पोजिशन राम्रै रहेको बताइएको छ । रसुवाका मोहन आचार्य, ओखलढुंगाका रामहरि खतिवडाले पनि राम्रै मत पाएको देखिन्छ ।

शनिबार र आइतबार सार्वजनिक बिदा भएकाले धेरै ठाउँमा गणना गरिएको हो । पूर्वमन्त्रीहरु तारिणीदत्त चटौत, सुरेन्द्र हमालहरुको पोजिशन निकै पछाडि रहेको प्रारम्भिक मतपरिणामबाट देखिएको छ ।