‘फाइट अफ फ्युरी’ मा मानव बेचबिखनको विरोध, नेपाली भाषामा समेत डब गरिने

नेपाली कलाकार तथा मार्शल आर्टका खेलाडी शन्नी बी केसीको हलिउड फिल्म ‘फाइट अफ फरी’ को फस्टलुक सार्वजनिक भएको छ । फिल्म केसीकै कथा र निर्देशनमा बनेको हो । उनी फिल्मका प्रमुख अभिनेता समेत हुन् ।

फिल्ममा अभिनेता ब्रुस्लीको फिल्म ‘इन्टर द ड्रागन’ मा काम गरेका कलाकार बब वाल, लियो फोङ, जो माइकल, एम एम ए फाइटरलगायतका कलाकारको अभिनय छ । अंग्रेजी भाषामा निर्मित यो फिल्म नेपालीमा डब गरेर नेपालमा समेत प्रदर्शन गरिनेछ ।

एक्सन जनराको उक्त फिल्मले मानव बेचबिखनविरुद्धको कथालाई उठाएको छ । फिल्मलाई हलिउडका थिएटर तथा ओटीटी प्लेटफर्म नेटफ्लिक्स, एमाजोन प्राइममा रिलिज गरिनेछ ।

शन्नीले बलिउडका अभिनेताहरु गोबिन्दा, मिथुनका फिल्ममा समेत काम गरिसकेका छन् । उनले केही समय अघि नेपाली फिल्म ‘गोर्खा रक्षक’ मा पनि काम गरेका थिए । उनले ‘जाहवाज’, ‘गैरकानुनी’, ‘प्यार कर के देखो’, ‘हत्या’, ‘दुश्मन’ लगायतका फिल्ममा पनि अभिनय गरेका छन् ।