भीम रावल अछाममा व्यस्त, एमसीसी टेबुल भए रातारात काठमाडौं आउने

एमालेका पूर्वउपाध्यक्ष तथा नेता भीम रावल मंसिर दोस्रो साताको महाधिवेशनलगत्तै गृहजिल्ला अछाम पुग्नुभएको छ । उहाँ दुई सातादेखि संगठनको काममा व्यस्त हुनुभएको अछामका एमालेजनले जानकारी दिएका छन् ।

अध्यक्षको प्रतिस्पर्धामा पराजित भएपछि उहाँ जिल्ला पुग्दा भव्य स्वागत गरिएको छ । कार्यकर्ताको उत्साह देखेर उहाँले सदरमुकाममा भएका कतिपय अनौपचारिक कार्यक्रममा आफ्नो मुद्दा स्थापित भएको बताउनुएको हो । उहाँले कार्यकर्ताहरुसँगको भेटघाटमा महाधिवेशनमा आफ्नो लाइन स्थापित भएको र आफूले उठाउँदै आएको मुद्दाको नैतिक रुपमा विजय भएको उल्लेख गर्नुभएको छ ।

रावलको भनाई उद्धृत गर्दै अछामबाट प्राप्त समाचारमा भनिएको छ, ‘प्राविधिक रुपमा हारजीत एउटा पक्ष हो । चुनावमा हारजीत स्वाभाविक हुन्छ । यहिँभित्र (एमालेमा) बसेर आफ्नो उद्देश्य र गन्तव्यलाई अघि बढाउँदै सफलता हात लगाउँछौं ।’

अछामका कार्यकर्ताहरुले पनि आगामी माघमा राष्ट्रियसभाको र त्यसपछि स्थानीय चुनाव आउन लागेकाले लगत्तै पार्टीको वास्तविकता र एउटा सिनारियो देखिने अठोट लिएको बताइन्छ ।

उहाँ सदरमुकामबाट जिल्लाको मेललेकमा भएको कार्यक्रममा पुग्नुभएको छ । नेता रावलले आजदेखि बोलाइएको संसद अधिवेशनमा एमसीसी टेबुल गरिए आफू तत्काल राजधानी फर्कने संकेत दिनुभएको छ । नभए अर्को दुई साता जिल्लामा खटिनेगरी कार्यक्रम तय गरिएको स्रोतले बताएको छ ।

यता, पार्टी स्थायी समितिमा भएको रावलको रिक्ततालाई लिएर अनेक टिकाटिप्पणी भएको छ । विगतमा पदाधिकारी हुँदा त उहाँको सुझाव नसुनिएकाले आगामी दिनमा थप कर्नरमा पारिने एकथरीले शंका गरेका छन् । उहाँको क्षेत्रबाट महाधिवेशन प्रतिनिधिसमेत एक्लौटी मनोनीत गरिएको सन्दर्भलाई उल्लेख गर्दै त्यस्तो विश्लेषण गरिएको हो ।

तर रावल समर्थकहरुमध्ये केहीले भनेका छन्, ‘उहाँ स्थायी समितिमा जानैपर्छ ।’ अर्काथरी समर्थकहरुले त्यस्तो कुरो सुन्न चाहेको देखिँदैन । उनीहरुका अनुसार स्थायी समिति भनेको सेकेण्डरी कुरा हो । ‘ओलीले एक्लौटी निर्णय गर्ने, पदाधिकारी समेतले ताली बजाउने, कसैले पनि केही बोल्ने आँट नगर्ने, तीन महिनामा एक पटक बस्ने स्थायी समितिको सदस्य भएर प्रभाव चाँही के हुन्छ ? अर्थ के रहन्छ ?,’ रावलका डाइहार्ट कार्यकर्ताको सुझाव हो यो ।

उनीहरुका अनुसार अहिलेको अवस्थामा एमालेभित्र सबैजना सन्तुष्ट छैनन् । आइतबारको बैठकमा सुनाइएको मनोनीतको सूचीबारे पनि पदाधिकारीहरुले समेत कुनै सुईंको पाएका थिएनन् । त्यसक्रममा न छलफल भयो, न जानकारी नै गराइएको थियो । अध्यक्षले एकैचोटी कोटको खल्तिबाट सूची निकालेर वाचन गर्नुभयो र कर्तलध्वनीका साथ पास भएपछि जनवादी शैलीलाई तिलाञ्जली दिइएकाले त्यस्तो कमिटीमा बसेर धारणा राख्नुको कुनै अर्थ नभएको रावल पक्षधरहरुको विश्लेषण छ ।

आइतबारको केन्द्रीय कमिटी बैठकमा युवराज ज्ञवाली र अष्टलक्ष्मी शाक्यले समेत अध्यक्ष ओलीले पनि नसुन्ने गरी आफ्ना कुरा राख्नुभएको बताइन्छ । ‘त्यसैले त्यस्तो कमिटी र बैठकको औचित्य के ? बरु बाहिर बसेर आफूसँग रहेको शक्तिलाई एकीकृत गरेर अघि बढाइन्छ,’ उनीहरुको अठोट हो यो ।

पार्टीभित्रको फोरममा अनुपस्थित हुँदा रावल थप पछाडि पर्नसक्ने सम्बन्धमा उनीहरु सहमत देखिँदैनन् । उनीहरुको आफ्नै तर्क छ, ‘रावलले अध्यक्षमा चुनाव लडेर हार्नुभएको हो । त्यसको सेटलमेण्ट र उपाध्यक्ष भइसकेको व्यक्तिलाई कहाँ एडजष्ट गर्ने भन्ने कुरो अध्यक्षको हो । यस्तो कुरो नेतृत्वले सोच्नुपर्छ, रावलले सोच्ने होइन ।’