प्रधानमन्त्री देउवाले पटक पटक राजनीतिक हिंसा गरेको गुरुराज घिमिरेको आरोप
नेपाली काँग्रेसका नेता गुरुराज घिमिरेले प्रधानमन्त्री एवम् पार्टी सभापति शेरबहादुर देउवाले आफूमाथि दोस्रो पटक राजनीतिक हिंसा गरेको आरोप लगाएका छन् । आज नेता प्रकाशमान सिंहको निवास ठमेल, चाक्सीबारीमा बोल्दै घिमिरेले नेपाली काँग्रेस प्रदेश नम्बर १ को निर्वाचनमा देउवाले सत्ताको चरम दुरुपयोग गरेर आफूलाई हराएको उल्लेख गरेका छन् ।
घिमिरेका अनुसार अहिलेको पराजय देउवाद्वारा आफूमाथि भएको दोस्रो पटकको राजनीतिक हिंसा हो । गत संसदीय निर्वाचनमा आफू जनमत, योगदान र पहिचानले पहिलो नम्बरमा रहे पनि टिकट नदिएर सभापति देउवाले पहिलो पटक राजनीतिक हिंसा गरेको आरोप लगाएका छन् ।
उनले स्वयम् पार्टी सभापतिबाट पार्टीको सिद्धान्त, आदर्श र मूल्य मान्यतालाई अपहेलित गरेर अधिवेशन गराइएको समेत आरोप लगाएका छन् । घिमिरेले भने, ‘काँग्रेसको प्रदेश नम्बर १ मा भएको निर्वाचन मूल्य स्खलनको एउटा चरम दृष्टान्त हो, जीवन्त दृष्टान्त हो । पार्टीको सिद्धान्त, आदर्श, मूल्य र मान्यतालाई कुल्चेर, त्यसलाई अपहेलित गरेर निर्वाचन सम्पन्न भएको छ । सत्ताको चरम दुरुपयोग गरिएको छ । राजनीतिक हिंसाको श्रृङ्खला उहाँले नै सुरु गर्नुभएको हो ।’
घिमिरेका अनुसार प्रदेश १ को निर्वाचनमा धनवाद र डनवादको चरम प्रयोग भएको छ । सभापति देउवाले आफ्नो गुटलाई पक्षपोषण र मलजल गर्न प्रधानमन्त्रीको कुर्सी दुरुपयोग गरिएको भन्दै पार्टीको महाधिवेशनमा सत्ताको चरम दुरुपयोग गर्नेले चर्को मूल्य चुकाउनुपर्ने घिमिरेको भनाइ छ ।
टिप्पणीहरू