राति बन्दसत्र राखेर धाँदली गर्न खोजेको भीम रावलको आरोप « Jana Aastha News Online
Logo
४ माघ २०७८, मंगलवार
|  Tue Jan 18 2022

राति बन्दसत्र राखेर धाँदली गर्न खोजेको भीम रावलको आरोप

प्रकाशित मिति :  १२ मंसिर २०७८, आईतवार १८:४४


चितवनमा जारी एमाले महाधिवेशनमा अध्यक्षको उम्मेदवारी दिएका उपाध्यक्ष भीम रावलले संस्थागत छलफल नगरी राति बैठक राख्ने निर्णयले धाँधलीलीको संकेत दिएको बताउनुभएको छ । निर्धारित समयमा बन्दसत्र नगरेर प्रतिनिधिलाई अलपत्र पारिएको उहाँको भनाइ छ ।

आज बिहान १० बजेदेखि शुरु हुने भनिएको बन्दसत्र साँझ सात बजेका लागि बोलाइएपछि रावलको यस्तो टिप्पणी आएको हो । उहाँले आफ्नो ट्वीटरमा लेख्नुभएको छ, ‘दिनभरि बैठक नगरेर प्रतिनिधिहरूलाई अलपत्र बनाउनु र संस्थागत छलफल नगरी राती ७ बजे बैठक हुने सूचना जारी गर्नु अलोकतान्त्रिक कार्य मात्र होइन धाँधलीको सङ्केत पनि हो । यसले जनताको बहुदलीय जनवादअन्तर्गत प्रतिस्पर्धाको राजनीतिमाथि आघात पुग्छ ।’

निर्विरोध अध्यक्ष बन्ने कसरतमा रहनुभएका ओली आज दिनभर निकट नेताहरुसँग छलफलमा बसेपछि बन्दसत्र ९ घण्टा ढिलो हुने भएको हो । दिनभरको गृहकार्यपछि ओली निकट चार नेताले केन्द्रीय सदस्यको सूची ओलीलाई बुझाएको र त्यसैलाई अन्तिम रुप दिएर साँझ सात बजे शुरु हुने बन्दसत्रबाट पारित गर्ने तयारी गरिएको बताइएको छ ।

हिजोको बन्दसत्रले अध्यक्ष ओलीलाई पदाधिकारी र केन्द्रीय सदस्यको नाम प्रस्ताव गर्ने एकल अधिकार सुम्पिएको थियो । त्यसलाई लिएर हलमै प्रतिवाद गर्नुभएका रावल भने निर्वाचनमार्फत नेतृत्व चयन गरिनुपर्ने अडानमा हुनुहुन्छ ।


प्रतिक्रिया दिनुहोस !