बागलुङका गाउँगाउँमा कर्मचारी भड्किए
लामो समयदेखि न्यून परिश्रमिकमा काम गर्नुपरेको भन्दै नेपाल विद्यालय कर्मचारी परिषद् नगर कार्यसमिति, जमिनी नगरपालिका, बाग्लुङले शिक्षा, विज्ञान तथा प्रविधि मन्त्रालयसमक्ष ज्ञापनपत्र बुझाएका छन् । विद्यालयका कर्मचारीहरुको न्यूनतम परिश्रमिक तोकिदिन माग गर्दै कार्यसमितिले मन्त्रालयलाई ज्ञापनपत्र बुझाएको हो ।
सामुदायिक विद्यालयमा कार्यरत विद्यालय कर्मचारीहरू लामो समयदेखि न्यून पारिश्रमिकमा काम गर्दै आइरहेको उनीहरुको भनाइ छ । नेपाल सरकारले समय समयमा तलबमान निर्धारण गर्दा सोअनुसार तलब नपाइएको उनीहरुको आरोप छ ।
सामुदायिक विद्यालयका कर्मचारीलाई अन्य शिक्षकसरह शिक्षा ऐनमा व्यवस्था गरी दरबन्दी सृजना गरेर सोअनुसारको तलबमान र सेवासुविधा सुनिश्चित गरिदिन ज्ञापनपत्रमा उल्लेख गरिएको छ ।
देशभरका विद्यालय कर्मचारीहरु न्यूनतम पारिश्रमिक र सेवासुविधाको माग गर्दै आन्दोलित छन् । कर्मचारीहरूसँगै प्रारम्भिक बालविकास सहजकर्ता इसीडी शिक्षक पनि आन्दोलित छन् ।
यता, शिक्षामन्त्री देवेन्द्र पौडेलले इसीडी शिक्षक र विद्यालय कर्मचारीको तलब सम्बन्धित पालिकाहरूले अनिवार्य दिनुपर्ने बताउनुभएको छ । उहाँले श्रम मन्त्रालयले तोकेको मासिक १५ हजार रपैयाँ पारिश्रमिक अनिवार्य रूपमा पाउने घोषणा यसअघि नै गर्नुभएको थियो ।
टिप्पणीहरू