याे वर्ष साल्ट ट्रेडिङको मुनाफा गुलियो होइन नुनिलो

साल्ट ट्रेडिङ कर्पोरेशनको चालु आर्थिको वर्षको पहिलो तीन महिनाको नाफामा झण्डै ६५ प्रतिशतले कमी आएको छ । आज जारी कर्पोरेशनको त्रयमासिक रिपोर्टमा अघिल्लो वर्षको अवधिभन्दा यो वर्ष ६४ दशमलव ९४ प्रतिशतले कम नाफा कम भएको हो ।

कम्पनीले चालु आर्थिक वर्षको पहिलो त्रयमासमा ४८ लाख ८५ हजार रुपैयाँ खुद नाफा गरेको छ । गत वर्षको सोही अवधिमा कम्पनीले १ करोड ३९ लाख ३५ हजार रुपैयाँ खुद नाफा गरेको थियो ।

यो वर्ष बिक्रीबाट हुने आम्दानी पनि ३० दशमलव ६० प्रतिशतबाट घटेर १ अर्ब ५९ करोड रुपैयाँमा झरेको कम्पनीले जनाएको छ । गत कर्पोरेशनले बिक्रीबाट २ अर्ब ३० करोड रुपैयाँ आम्दानी गरेको थियो ।

साल्ट ट्रेडिङको चुक्ता पुँजी २३ करोड ४ लाख २९ हजार रुपैयाँ छ । उसको प्रतिसेयर आम्दानी ८ रुपैयाँ ४८ पैसा र प्रतिसेयर नेटवर्थ ४ सय ४९ रुपैयाँ ६६ पैसा रहेको छ ।