कर्मचारीलाई कुटपिट गर्ने पार्टीका कार्यकर्ता छोडिए

खानेपानी तथा ढल व्यवस्थापन आयोजना जनकपुरका निमित्त प्रमुख राजेश्वर कुशवाहालाई दुर्व्यवहार गरेको अभियोगमा पक्राउ परेका सिके राउत नेतृत्वको जनमत पार्टीका कार्यकर्ताहरु रिहा भएका छन् । जिल्ला अदालतको आदेशमा उनीहरु आज धरौटीमा छुटेका हुन् ।

पक्राउ परेका १७ जनामध्ये सात जना एक लाख र १० जना ५० हजार रुपैयामा धरौटीमा रिहा भएका हुन् । उनीहरुले गत कार्तिक ५ गते दिउँसो कुशवाहालाई कार्याकक्षबाटै नियन्त्रणमा लिई शरीरमा हिलो छ्यापेर अर्धनग्न अवस्थामा जनकपुरधाम बजार घुमाएका थिए ।

त्यसलगत्तै प्रहरीले सो पार्टीका केन्द्रीय सदस्य वीरेन्द्र महतो, धनुषा अध्यक्ष ओमविक्रम कुशवाहा, सर्लाहीका सदस्य दुर्योधन यादव, प्रेमकिशोर यादव, विद्यार्थी जनमत संघका अध्यक्ष विजय यादवसहित १७ जनालाई नियन्त्रणमा लिई अपराधिक अभद्र र अमानवीय व्यवहारविरुद्धको कसूरमा मुद्दा चलाएको थियो ।