उदयपुरमा पनि १० बुँदे पक्षधरको बेहाल
नेकपा एमालेको १० औँ महाधिवेशनका लागि प्रतिनिधि चयनमा उदयपुरमा ‘तेस्रोधार’ को कन्तबिजोग हुन नपाए पनि बिस्तारै बढारिने क्रम शुरु भएको छ । जिल्लावाट १६ जना महाधिवेशन प्रतिनिधि छनौट हुँदा १० बुँदे पक्षधर ‘१० भाइ’ समूहबाट जम्मा तीन जना चुनिएका छन् ।
दुई निर्वाचन क्षेत्र रहेको उदयपुरमा क्षेत्र नम्बर २ मा निर्विरोध र १ मा मतदानमार्फत प्रतिनिधि टुङ्गो लगाइएको थियो । निर्वाचन भएको क्षेत्र नम्बर १ मा छानिएका आठ जनामध्ये ‘१० भाइ’ समूहका एक जना मात्रै छन् । यसरी चुनिनेमा जिल्ला अध्यक्ष इश्वरमणि राउत हुन् । उनले ७ सय ८६ मत ल्याएर जितेका हुन् ।
अध्यक्ष राउतबाहेक खुला तर्फबाट बेलका नगरपालिकाका प्रमुख दुर्गाकुमार थापा १ हजार ८६, तत्कालीन ओली खेमाका अध्यक्ष तथा हालका सचिव प्रमेश घिमिरे ७ सय २२, प्रदेश सांसद विमल कार्की ७ सय ८५, कुशलबाबु बस्नेत ६ सय ५१ र कालु लामा ६ सय २४ मत पाएर निर्वाचित भएका छन् । त्यस्तै, समावेशीतर्फ सिर्जना दनुवार ८ सय र महेश्वरी राई ७ सय २१ मत प्राप्त गरेर प्रतिनिधि छानिएका छन् ।
नेपाल कम्युनिष्ट पार्टी (एकीकृत समाजवादी) मा जिम्मेवारी पाएका र समाहित भएका पूर्व एमालेहरुलाई पनि निर्वाचनमा भाग लिन आह्वान गरिएको थियो । उनीहरुलाई पार्टी सदस्यता नवीकरण गरिएको जानकारी गराइएको थियो । तर आठ हजारको हाराहारीमा सदस्यता रहेको एमालेको उक्त निर्वाचन क्षेत्रमा १ हजार ८ सय ६९ जनाले मात्र भाग लिएका थिए ।
निर्वाचितमध्ये बेलकाका प्रमुख थापाबाहेक सबै सदरमुकाम गाईघाटभित्र घर तथा बसोबास भएका हुन् । यसले एमालेको शहर केन्द्रीत राजनीतिलाई सतहमा ल्याइदिएको छ ।
‘१० भाइ’ समूह मात्र होइन उदयपुरमा पुराना कम्युनिष्ट नेताहरु पनि प्रतिनिधि छानिनबाट बन्चित भएका छन् । मणिराज पौड्याल, पदमबहादुर राई, चन्द्रनारायण चौधरी, नारदराज थापा, धनपति आचार्य र डिल्लीराम विमली जस्ता पाका र पुराना नेताहरुले इज्जतिलो मत समेत प्राप्त गर्न सकेनन् । उनीहरुले कसैले पनि ५ सय मत कटाएका छैन् । यसले एमालेभित्र पुराना कम्युनिष्टहरुको समेत कन्तबिजोग शुरु भएको संकेत गरेको छ ।
उम्मेदवार बनेका थारु, दनुवार, दलित र व्राह्मण समुदायका नेतृत्वको करिब–करिब पत्ता साफ भएको छ । चर्चित एमाले नेताका रुपमा रहेका वेदप्रसाद पोखरेललगायत धेरैले गुटबन्दीका कारण उम्मेदवारी दिने हिम्मतसमेत गरेनन् । त्यसैगरी, आदिवासी जनजाति बाहुल्य क्षेत्र भए पनि उनीहरुको आशलाग्दो प्रतिनिधित्व समेत हुन सकेको देखिएको छैन । जनजाति बाहुल्य क्षेत्र रहेको सो क्षेत्रमा उनीहरुको उपस्थिति नगण्य मात्रामा देखिएको छ ।
तेस्रोधार भनिने कतिपयले भने ओलीलाई भगवान बनाउनबाट रोक्न सक्ने ल्याकत नभएकाले निर्वाचनमा भाग नलिएको बताएका छन् । निर्वाचन क्षेत्र नम्बर २ बाट भने कटारी नगरपालिकाका प्रमुख ज्ञानेन्द्र श्रेष्ठ र उपप्रमुख भीमकुमारी राउत दुबै जना सर्वसम्मत प्रतिनिधि छानिएका छन् । छ जना प्रतिनिधिमध्ये अमर रायमाझी र ताप्ली गाउँपालिकाका अध्यक्ष उद्धवसिंह थापा भने १० बुँदेका तर्फबाट सर्वसम्मतमा पर्न सफल भएका छन् । बाँकी दुई शैलेश राई र कला घले भने ओली खेमाका हुन् ।
उदयपुरमा प्रतिनिधि छानिएका १६ मध्ये दुई दलित कोटाबाट जिल्ला समन्वय प्रमुख खड्ग परियार र गिरी परियारले सर्वसम्मतरुपमा बाजि मारेको देखिन्छ । उदयपुरको २ नम्बर निर्वाचन क्षेत्रमा राम्रो मत संख्या भएको दनुवार राई र तामाङहरुले सर्वसम्मतको नाममा नेतृत्व विकास गर्ने अवसरबाट वञ्चित तुल्याएको गुनासो गरेका छन् ।
टिप्पणीहरू