राजदूत नियुक्तिको बल्ल खुल्यो रहस्य

आफ्ना अध्यक्ष प्रचण्डलाई समेत विवादमा मुछ्ने गरी प्रधानमन्त्री शेरबहादुर देउवाले विमानस्थलमा बोलेको कुरालाई लिएर माओवादीका केही नेता कडिकडाउसँग पेश हुन खोज्दै थिए । तर, ‘मलाई किन गाली ग¥या, प्रचण्डलाई सोध्न’ भन्दै देउवा टक्टकिएपछि माओवादी नेताले पत्तो पाए, कमजोरी त प्रचण्डबाट पनि भएको रहेछ !

पारित गर्नेबारे प्रधानमन्त्री देउवा र माओवादी अध्यक्ष प्रचण्डले हस्ताक्षर गरेर अमेरिकामा चिठी पठाएको कुरामा हो, यस्तो भएको । खासमा प्रधानमन्त्री सरकारी मानिस हो । उहाँले लेख्ने पत्रमा प्रचण्डले पार्टी अध्यक्षकै हैसियतले हस्ताक्षर गर्न मिल्दैन ।

तर, एउटा चिठीमा चाहिँ यी दुबैले साझा हस्ताक्षर गरेकै हो भन्ने कुरा नारायणकाजी श्रेष्ठ, हरिबोल गजुरेल र कृष्णबहादुर महरासहितका माओवादी नेताहरूले पत्ता लगाएका छन् । त्यसमा एमसिसी पारित गर्ने बचनबद्धता छैन, सहमतिका निम्ति पहल गर्ने कुरासम्म उल्लेख छ ।

अर्कातिर, अमेरिका, बेलायत र भारतका लागि राजदूत सिफारिस गरिँदा प्रचण्डले देउवालाई गोप्य सहमति दिएको पनि माओवादी नेताले पत्ता लगाएका छन् । तीनमध्ये सोध्दा बेलायतका लागि सिफारिस गरिएका ज्ञानचन्द्र आचार्यको हकमा मात्र सहमति दिइएको स्वीकारिएको छ ।

अहिले ती नेता चर्चा गर्दैछन्, ओलीशैलीको । ओलीले रिस उठाएर हैन, मान्छे सिध्याउनु परे पनि फकाएर गर्थे । अहिले एकीकृत समाजवादीको सचिव रहेका प्रकाश ज्वाला केही वर्षअघि बेल्जियम जाने बिदा माग्न बालकोट पुगे । ओलीले बाटोमा काम लाग्छ भन्दै ११ सय डलर दिएर पठाए ।

अखिल नेत्री नवीना लामा दिल्लीमा उपचार गर्न जानुअघि दुई कार्यकर्तासँगै केपीकहाँ जाँदा नवीनालाई ७ सय, युवतीहरूलाई पाँच–पाँच सय डलर दिए । केशव बडाललाई पत्नीको उपचार गर्न तीन लाख दिए । अहिले बडाल ओलीसँगै छन् । तर, प्रचण्डले चाहिँ सही सूचना नदिएर सहकर्मी चिढ्याइरहेको ती नेताले आपसमा कुरा गरेका छन् ।