प्रमोद खरेलको नयाँ स्वरमा ‘एकै चोटी मारन ओए’ बजारमा

आधुनिक गीत संगीतका चर्चित गायक प्रमोद खरेलको स्वरमा एकै चोटी मारन ओए बोलको गीत बजारमा आएको छ । आज दिउँसो खरेलको स्वरको उक्त गीत पुरुषोत्तम पौडेल युटुब च्यानल मार्फत् सार्वजनिक भएको हो ।

उमङ्ग म्युजिक प्रा. लि. ले बजारमा ल्याएको उक्त गीतमा प्रेमी जोडी बिछोडिएको विषयलाई उठाइएको छ । गीतमा प्रेमीले विछोडको पीडा सहन नसकेको र एकै चोटी मार किन पलपल मार्छौ भन्ने भाव झल्काइएको छ ।

नायिका शिल्पा पोखरेल र गायक तथा मोडल पुरुषोत्तम पौडेलको अभिनय रहेको गीतमा खलपात्रको भूमिका पत्रकार कृष्ण पहाडीले खेलेका छन् । आमाको भूमिकामा रिता भट्टराई देखिएकी छन् । गीतमा शिल्पा र पुरुषोत्तमको प्रेम सम्बन्ध रहेको र अन्तत शिल्पाको बिबाह जबरजस्ती कृष्णसँग भएको देखाइएको छ ।

शिव पौडेलको शब्द रहेको उक्त गीतमा संगीत ऋषी खड्काले भरेका छन् । कमल सौरागको एरेञ्ज रहेको गीतको रेकर्डिङ सुमन राना र खुमन रानाले गरेका छन् । गीत मारुनी डिजिटल रेकर्डिङ स्टुडियोमा भएको उत्पादक कम्पनी उमङ्ग फिल्मस्ले जनाएको छ ।

कपिल लामाको निर्देशन रहेको गीतको छयाङ्कन अजय रेग्मीले गरेका हुन् । शिव पौडेलको सम्पादन रहेको गीतमा कलर तथा भिएफएक्स भने विकास ज्ञवालीको हो ।