योगेश भट्टराईलाई हालका अखिल अध्यक्ष सुदेशको कटाक्ष

नेकपा (एकीकृत समाजवादी)निकट विद्यार्थी संगठन अनेरास्ववियूका अध्यक्ष सुदेश पराजुलीले आफ्नो पार्टीलाई अवैध भन्ने एमाले नेता योगेश भट्टराईलाई जथाभावी नबोल्न चेतावनी दिएका छन् ।

भट्टराईले हिजो एमाले मुख्यालयमा आयोजित पत्रकार सम्मेलनमा एकीकृत समाजवादी पार्टीलाई अवैध सम्बन्धबाट जन्मिएको पार्टीको संज्ञा दिएका थिए । त्यसको जवाफमा अध्यक्ष पराजुलीले संविधान र दलसम्बन्धी कानुनको व्यवस्था पढेर मात्र बोल्न चेतावनी दिएका हुन् ।

‘यो केपी ओलीको एकदलीय व्यवस्था होइन आदरणीय दाइ योगेश भट्टराई,कुन दल वैधानिक वा अवैधानिक भन्ने आधार तपाईंले तय गर्ने होइन’, उनले सामाजिक सञ्जाल फेसबुकमार्फत भनेका छन्, ‘ नेपालको संविधान छ ,नेपालमा संवैधानिक निकाय निर्वाचन आयोग छ ।’

उनले निर्वाचन आयोगको भूमिका निर्वाह गरेको हो ? भन्दै भटराईमाथि कटाक्षपूर्ण प्रश्नसमेत गरेका छन् । लोकतान्त्रिक व्यवस्थामा दलको पहिचानको निर्क्योल जनताको बीचबाट हुने भन्दै पराजुलीले भटराईको लोकतन्त्रविरोधी भनाइले आश्चर्यमा परेको बताएका छन्।

हिजो केपी ओलीको प्रतिगामी कदमका विरुद्ध मन्चमा बोल्ने योगेश भट्टराई र आज अन्य पार्टीलाई वैध र अवैध भन्ने योगेश भट्टराई एउटै हो ? प्रश्न गर्दै उनले भनेका छन्, ‘बहुदलीय व्यवस्थाको झण्डा बोक्ने योगेश दाइ र आज निर्दलीय व्यवस्थाको पक्षपोषण गर्ने योगेश दाइको मेल कसरी हुन्छ होला ?’

उनले नेपाल कम्युनिस्ट पार्टी (एकीकृत समाजवादी) को ठेगाना खोज्न र सोध्न निर्वाचन आयोगमा जान सल्लाहसमेत दिएका छन्।