मुख्यमन्त्री पाण्डेको पहिलो निर्णय ‘संक्रामक रोग नियन्त्रणमा ध्यान दिने’ « Jana Aastha News Online
Logo
१२ मंसिर २०७८, आईतवार
|  Sun Nov 28 2021

मुख्यमन्त्री पाण्डेको पहिलो निर्णय ‘संक्रामक रोग नियन्त्रणमा ध्यान दिने’

प्रकाशित मिति :  ११ कार्तिक २०७८, बिहीबार १९:४४


बागमती प्रदेशका नवनियुक्त राजेन्द्रप्रसाद पाण्डेले प्रदेश प्रमुख यादवचन्द्र शर्मासँग सपथ लिएसँगै पदभार ग्रहण गर्नुभएको छ । पदभार ग्रहणसँगै उहाँले पहिलो फाइल सदर गर्नुभएको मुख्यमन्त्री तथा मन्त्रिपरिषद्को कार्यालयले जनाएको छ ।

कार्यालयका अनुसार मुख्यमन्त्री पाण्डेले सदर गर्नुभएको फाइलमा उल्लेखित निर्णयमा कोभिड १९ सहित डेंगु, स्क्रब टाइफसलगायत सरुवा रोगहरुको नियन्त्रणका लागि उपलब्ध स्वास्थ्य सेवा र सुविधाहरुको प्रभावकारी व्यवस्था र क्षमता वृद्धि गरी थप प्रभावकारी बनाउन १३ वटै जिल्लाका अस्पताल, स्वास्थ्य चौकी तथा संस्थाहरुलाई परिचालन गर्न स्वास्थ्य मन्त्रालयलाई निर्देशन दिने उल्लेख छ । उहाँले स्वास्थ्य क्षेत्र संवेदनशील भएकाले प्रदेश सरकारको पहिलो ध्यान स्वास्थ्य क्षेत्रमै हुनुपर्नेमा जोड दिनु भएको हो ।

यसैबीच पदबहालीपछि पत्रकारहरुसँग कुराकानी गर्दै मुख्यमन्त्री पाण्डेले केपी ओली सरकारले संघीयतालाई सखाप पार्ने गरी बिगारेको संरचना र व्यवहारलाई संवैधानिक र व्यवहारिक रुपमै सुधारेर लगिने बताउनुभयो । उहाँले भन्नुभयो, ‘ओलीजीले प्रदेशलाई संघीय सरकारको युनिट नाम दिएर अधिकार कटौती गर्ने, संघीयतालाई नै असफल पार्ने प्रयत्न गर्नुभयो, त्यसलाई हामी कानुनी रुपमा र व्यवहारिक रुपमा सुधार गर्नेछौँ ।’ उहाँले आफू भूमिगतकालको कम्युनिष्ट राजनीतिबाट आएको भन्दै पटक पटक ‘सर्वहारा’ का पिरमर्कालाई सम्बोधन गर्न लागिपर्ने बताउनुभएको छ ।

आजै साँझ पाण्डे नेतृत्वको चार सदस्यीय बागमती प्रदेश सरकारको बैठक बसेको छ । प्रदेश प्रमुख शर्माले आजै मुख्यमन्त्री पाण्डे, आन्तरिक मामिला तथा कानुनमन्त्री कृष्णप्रसाद खनाल, सामाजिक विकास मन्त्री कुमारी मोक्तान र भौतिक पूर्वाधार विकास मन्त्रीमा कृष्णलाल भँडेललाई सपथ गराउनुभएको थियो । बाँकी मन्त्रालयहरुमा छिट्टै मन्त्रीहरु नियुक्त हुने मुख्यमन्त्री पाण्डेले बताउनुभएको छ ।


प्रतिक्रिया दिनुहोस !
सम्बन्धित खबरहरु