भक्तपुरमा राष्ट्रिय परिचयपत्रको लागि १८ हजारको विवरण, थप संकलन हुँदै
भक्तपुरमा राष्ट्रिय परिचयपत्रको लागि हालसम्म १८ हजार जनाले विवरण बुझाएका छन् । चाँगुनारायण नगरपालिकाका नौ वटा वडा र सूर्यविनायक नगरपालिकाको १ देखि ४ नम्बर वडामा गरिएको विवरण संकलनमा उनीहरुले उक्त फाराम भरेका हुन् ।
यसैबीच सूर्यविनायक नगरपालिकाको ६ देखि १० नम्बर वडासम्म आजदेखि उक्त अभियान शुरु भएको छ । अभियानअन्तर्गत प्रत्येक वडामा ३ वा ४ वटा केन्द्र रहने छन् । एउटा केन्द्रमा एक जना कम्युटर अपरेटर, दुई छानबिन अधिकारी र एक जना सहयोगी रहने सहायक जिल्ला प्रमुख अधिकारी सीता परियारले जानकारी दिनुभएको छ ।
उहाँले भोलिदेखि भक्तपुर र मध्यपुरथिमी नगरपालिकामा पनि यो अभियान सञ्चालन गरिने जानकारी दिनुभयो । ‘भक्तपुर नगरपालिकामा एक दुई दिनभित्रै रुजु अधिकारीलाई अभिमुखीकरण तालिम गरेर कार्यस्थलमा खटाइ अभियान शुरु गर्ने तयारी भइरहेको छ । त्यसपछि मध्यपुरथिमीमा अभियान शुरु गर्छौं,’ उहाँले भन्नुभयो ।
राष्ट्रिय परिचयपत्र नागरिकताभन्दा पनि प्रभावकारी हुने सरकारी अधिकारीहरुको दाबी छ । यसमा व्यक्तिको हातका दश ओटा औंला छाप, मासिक आम्दानी, तीन पुस्ताको विवरणलगायतका तथ्याङ्कसमावेश गरिएको छ ।
साथै नक्कली वा दोहोरो नबनोस् भन्नाको लागि परिचयपत्रमा आँखाको नानीको स्क्यान गर्ने व्यवस्था राखिएको भक्तपुर नगरपालिकाले जनाएको छ । भक्तपुर नगरपालिकाले आफ्ना सम्पूर्ण नगरबासीलाई उक्त विवरण भर्न आह्वान समेत गरेको छ ।
टिप्पणीहरू