बेमौसमी वर्षाले किसान ठहरै, चामल व्यापारी मालामाल

असारमा रोपेर असोजको अन्त्यदेखि कात्तिकको पहिलो सातासम्ममा स्याहानुपर्ने धानबालीमा बेमौसमी वर्षाले पूर्णक्षती पुर्याएपछि किसानहरुलाई वर्ष दिनसम्म के खाने भन्ने चिन्ताले सताएको छ । यो वर्ष समयमै वर्षा हुँदा तुलनात्मक रुपमा धानबालीको उत्पादन राम्रो हुने अनुमान गरिएको थियो ।

तर धान भित्र्याउने बेलामा परेको मुसलधारे र लगतारको वर्षाले गर्दा किसानले लगानी समेत उठाउन नसक्ने अवस्था देखिएको हो । वर्षाले खेतमै धान उम्रेपछि अरबौं रुपैयाँको क्षति भएको बताइएको छ ।

कृषि मन्त्रालयअन्तर्गतको कृषि विभागका अनुसार धान खेतीको पकेट क्षेत्र मानिएका तीन वटा प्रदेशमा मात्र ५८ हजार मेट्रिक टन धान नष्ट भएको बताइएको छ । विभागका अनुसार सुदूरपश्चिम प्रदेश, लुम्बिनी प्रदेश र प्रदेश नम्बर १ मा अत्यधिक क्षति पुगेको छ ।

यता किसानलाई अबको एक वर्ष कसरी छाक टार्ने भन्ने प्रश्नले सताउँदा चामल उत्पादक कम्पनी (राइस मिल) हरुलाई भने फाइदै फाइदा हुने अवस्था देखिएको छ । खेतमा भिजेको धान कौडीको भाउमा किन्न थालिएको छ । त्यस्तो धानलाई कारखानामा लगेर उमालेपछि स्टिम चामल बन्छ । त्यहि स्टिम चामललाई पछि बजारमा महंगो मूल्यमा बिक्री गरेर मनग्य आम्दानी गर्ने मौका व्यवसायीहरुले पाएको बताउन थालिएको छ ।