धार्मिक जुलुसमाथि जब बौलाहा कार कुदाइयो
भारतको छत्तिसगढस्थित जसपुरमा दुर्गामूर्ति विसर्जनको लागि जाँदै गरेको धार्मिक जुलुसमा जथाभावी चलाइएको कारले ठक्कर दिँदा २० जना सिकिस्त घाइते भएका छन् । जानजान भीडमा तीब्र गतिमा चलाइएको कारको ठक्करबाट ४ जनाको मृत्यु भएको छ ।
घटनापछि घाइतेहरुलाई स्थानीय जनताको सहयोगमा तत्काल उपचारको लागि पथलगाउँको सिभिल अस्पताल लगिएको भारतीय सञ्चार माध्यमहरुले जनाएका छन् । जथाभावी कार चलाउने दुई जनालाई अभियुक्तको रुपमा पक्राउ गरिएको छ ।
पक्राउ परेका दुबै बब्लु विश्वकर्मा र शिशुपाल साहु मध्यप्रदेश निवासी हुन् । उनीहरू छत्तिसगढ हुँदै मध्यप्रदेशतर्फ जाँदै गरेको अवस्थामा स्थानीय धार्मिक जुलुसमा जथाभावी कार चलाएको भारतीय प्रहरीले जनाएको छ ।
यस्तै त्यहाँका मुख्यमन्त्री भूपेश बघेलले उक्त घटनालाई हृदयस्पर्शी भनेका छन् । मुख्यमन्त्रीले जारी गरेको विज्ञप्तिमा भनिएको छ, ‘अपराधीहरुलाई गिरफ्तार गरिएको छ । जिम्मेवार देखिएका प्रहरी अधिकारीहरुविरुद्ध कारबाही भइरहेको छ । छानबिनको आदेश दिइएको छ । घटनामा संलग्न कसैलाई पनि छाडिने छैन ।’
धार्मिक जुलुसमा सहभागीहरुमाथि चढाइएको कार मध्य प्रदेशको नम्बर प्लेट रहेको महिन्द्रा जाइलो हो । मानिसहरुमाथि अत्याचारी ढंगले चलाइएको कार घटनापछि केही पर सुनसान ठाउँमा फेला परेको भारतीय सञ्चार माध्यमले जनाएका छन् ।
टिप्पणीहरू