पत्नीसाथ हेलिकोप्टरमा सवार हुने मुख्यमन्त्री विपद्मा बेपत्ता’

तीन दिनदेखिको अविरल वर्षापछि कालीकोटमा गएको पहिरोले सोमबार राति घर भत्किँदा महाबै गाउँपालिका–७ राम्नीकी १८ वर्षीया स्मृति अधिकारीको मृत्यु भएको छ । उनीसँगै सुतेकी १५ वर्षीया बहिनी इशानी घाइते भएकी छन् । विष्णुलाल अधिकारीको घर भत्किँदा उनकी जेठी छोरी स्मृतिको घटनास्थलमै मृत्यु भएको हो । घाइते इशानीको स्थानीय स्वास्थ्य संस्थामा उपचार भइरहेको छ ।

पहिरोले सोही गाउँका अन्य पाँच वटा घर पनि भत्किएका छन् । २५ वटा घर जोखिममा छन् । जोखिममा रहेका २५ घर परिवारलाई हिजो सोमबार मध्यरात स्थानीय राम मावि राम्नी र स्वास्थ्य चौकीको भवनमा सारिएको प्रहरीले जनाएको छ । सोमबार राति नै पादमघाट प्रहरी चौकी र सदरमुकाम मान्मबाट प्रहरी टोली घटनास्थल गएको छ । त्यहाँको गाउँ नै पहिरोको जोखिममा रहेको स्थानीयले बताए ।

सदरमुकामकै १३ घर जोखिममा

पहिरोले कालिकोटको सदरमुकाम मान्मका १३ वटा घर जोखिममा परेका छन् । अविरल वर्षाकै कारण खाँडाचक्र नगरपालिका–१ मान्म बजारस्थित एलना मेडिकल हल पछाडिको पर्खाल भत्किँदा औषधि पसलमा क्षति पुगेको छ । मान्म बजारको नाव गैराका १३ वटा घरसमेत जोखिममा रहेको प्रहरीले जनाएको छ ।

‘गाउँपालिकाको भवन उद्घाटन गर्न हेलिकोप्टरको प्रयोग गर्ने मुख्यमन्त्री कता छन् ? के निर्देशन दिए ? राहत तथा उध्दारका लागि के गरे?”

ताडीबाट मान्म बजार आउने साकालामा ढुंगा नजिकै पुरानो बाटोमा पहिरो जाँदा आवागमन नै रोकिएको छ । त्यस्तै,वर्षाले कर्णाली नदीमा बाढी आउँदा कर्णाली करिडोर जोड्न जितेस्थित कर्णाली नदीमा रहेको फेरि बगाएको छ । फेरि बगाएपछि कर्णाली करिडोरमा सवारी साधन गुडाउन समस्या भएको छ ।

कर्णाली राजमार्ग अवरुध्द

अविरल वर्षाले कर्णाली राजमार्गअन्तर्गत सुर्खेत–जुम्ला सडकको ठाउँ–ठाउँमा पहिरो गएपछि राजमार्ग अवरुध्द भएको छ । राजमार्गको दैलेख पाल्ताडा, राकम,घट्टेखोला,दैखोला, कालीकोटको गगने,सेरि, सुनारखोला,मोल्फा,पिली सेरावाडालगायतका ठाउँमा पहिरोले सडक अवरुद्ध गरेको छ ।

बेखबर झैं प्रदेश सरकार

प्रधानमन्त्री शेरबहादुर देउवाले कर्णालीलगायत सुदूरपश्चिमका विभिन्न क्षेत्रमा अविरल वर्षाका कारण गएको बाढी,पहिरो र डुबानबाट प्रभावितलाई तत्काल राहत तथा उध्दारको व्यवस्था गर्न एकाबिहानै गृहमन्त्रीलाई निर्देशन दिएपछि गृह प्रशासन पनि राहत तथा उध्दारमा खटिसकेको छ । तर,कर्णाली सरकार यतिबेला के गरिरहेको छ ? कहाँ छ ? अत्तोपत्तो छैन ।

कर्णालीका मुख्यमन्त्री महेन्द्र शाहीकै गृह जिल्ला कालिकोटमा बाढी पहिरोले क्षति गरिरहेको छ । मृत्यु हुने,घाइते हुने,विस्थापित हुने अथवा पीडामा पर्ने अधिकांश मुख्यमन्त्रीकै मतदाता हुन् ।

यस्तो बेलामा पनि कर्णाली सरकार कानमा तेल हालेर बसेको स्थानीयको आरोप छ । ‘गाउँपालिकाको भवन उद्घाटन गर्न हेलिकोप्टरको प्रयोग गर्ने मुख्यमन्त्री कता छन् ? के निर्देशन दिए ? राहत तथा उध्दारका लागि के गरे ?,’ उनीहरुले प्रश्न गरेका छन् । गृह प्रशासनबाट प्रधानमन्त्रीले सम्पूर्ण निकायलाई राहत तथा उद्धारमा खटिन निर्देशन दिइसक्दा पनि कर्णाली सरकार र मुख्यमन्त्री शाही भने निरीह बनेको बताइन्छ ।
पत्नीलाई लिएर जन्मस्थान भ्रमण गर्न र गाउँपालिकाको भवन उद्घाटन गर्न हेलिकप्टर लिएर गएको विषयलाई अहिलेको विपद्सँग जोडेर चर्चा गर्न थालिएको छ । सामाजिक सञ्जालमा, ‘कुनै गाउँसभामा जान र नेता कार्यकर्तासमेत भेट्न हेलिकोप्टरको प्रयोग गर्ने मुख्यमन्त्री अहिलेको विपद्मा उनको हेलिकोप्टर कता छ ? अत्तोपत्तो छैन ।’ भनेर लेखिएको छ ।

मुख्यमन्त्री र उनी नेतृत्वको सरकार निरीह बनेको कालीकोट विपद्मा मात्रै होइन,मुगु बस दुर्घटनामा पनि उस्तै थियो । पहिरोबाट पूरै गाउँ जोखिममा पर्दा राहत तथा उध्दारका लागि कर्णाली सरकारबाट कुनै पहल नभएपछि उनको आलोचना भएको हो ।