राजदूतको पालो कुरेका सहसचिवहरु एउटै कोठामा दुई जना
सरकारले ११ वटा मुलुकमा रहेका कूटनीतिक नियोगबाट राजदूत फिर्ता बोलाउने भएपछि अब विदेशस्थित राजदूत रिक्त भएका नियोगको संख्या २३ पुगेको छ । १० जना मन्त्रालयका सहसचिवहरु (करियर कूटनीतिज्ञ) भने अझै पनि राजदूतको हैसियतमा त्यहिँ छन् ।
अब नियुक्त गरिने झण्डै दुई दर्जन राजदूतमध्ये करियर डिप्लोम्याटबाट आधा दर्जन पाइपलाइनमा देखिन्छन् । त्यसरी कुरेर बसेका सहसचिवहरुमध्ये निर्मल काफ्ले सबैभन्दा वरिष्ठ हुन् । उनी यसअघि ओली सरकारबाट दुई पटक सिफारिशमा परेर पनि अन्तिम अवस्थामा समस्या आएको हो ।
राजदूत नियुक्तिको निम्ति सरकारले नयाँ मापदण्ड बनाउने भनेको छ । करियर कूटनीतिज्ञको निम्ति वरिष्ठलाई आधार मान्ने भनिए पनि त्यो स्पष्ट छैन । मन्त्रालयमा बसेको हिसाबले वरिष्ठ मान्ने कि अन्य कुनै भन्ने प्रश्न पनि उठाइएको छ । एकथरिले नियुक्ति बुझेको मितिलाई वरिष्ठ मान्नुपर्ने नयाँ तर्क निकालेको बुझिएको छ ।मन्त्रालयमा सहसचिवको कुर्सीमा बसेर राजदूतको पालो कुरेकाहरुमध्ये काफ्ले,हरिश्चन्द्र घिमिरे,सुशील लम्साल,तेजबहादुर क्षेत्री,तीर्थ वाग्ले,भरत रेग्मी मुख्य हुन् । सरकारले कम्तिमा ६ जना र बढीमा ७ जना सहसचिवलाई नियुक्त गर्नुपर्ने आवाज परराष्ट्र मन्त्रालयमा उठेको छ ।
मन्त्रालयमा सहसचिवहरुलाई जिम्मेवारीसहितको काम नभएकाले पनि तत्काल राजदूत बनाएर कार्यस्थलको अभावलाई मार्ग प्रशस्त गर्नुपर्ने अवस्थासमेत देखिएको छ । पछिल्लो समयमा दुई जना सहसचिवलाई एउटै कोठामा राखिएको छ । पर्याप्त कोठा नभएकाले त्यसो गरिएको मन्त्रालय स्रोतले बताएको छ । त्यसरी राखिएका सहसचिवहरुमा तेजबहादुर र सुधिर भट्टराई हुन् ।
टिप्पणीहरू