विधानमै ओलीलाई सजिलो हुनेगरी उमेर हदको ब्याख्या

अध्यक्ष केपी शर्मा ओलीको देवत्वकरण गरिएको चर्चाका बीच नेकपा एमालेको विधानमा ओलीलाई लक्षित गरेर ७० वर्षे उमेर हदसम्बन्धी नयाँ व्यवस्था गरिएको छ । जारी विधान महाधिवेशनमा अध्यक्ष ओलीलाई सजिलो हुने ब्याख्यासहितको ७० वर्षे उमेर हद कायम गरिएको हो ।

उमेर हदबारे थप ब्याख्या गर्दै ७० वर्ष पूरा हुनुअघि नै उम्मेदवार भएर जितेको खण्डमा उसले पूरा कार्यकाल काम गर्न पाउने व्यवस्था विधानमा व्यवस्था गरिएको छ । फागुनदेखि ७१ वर्ष लाग्न लाग्नुभएका ओलीलाई पुन: अध्यक्ष बन्ने बाटो खुला गर्ने मनशायका साथ यस्तो व्यवस्था गरिएको दाबी गरिएको छ ।

महाधिवेशनको तेस्रो तथा अन्तिम दिन आज विधान संशोधन प्रस्तावमाथि उठेका प्रश्नको जवाफ दिने क्रममा उपमहासचिव विष्णु पौडेलले ७० वर्षे उमेर हदबारे व्याख्या गर्नुभएको थियो । सो क्रममा उहाँले कुनै पनि व्यक्ति पार्टीको कमिटीमा ७० वर्ष पूरा नहुँदै निर्वाचित भएमा कार्यकालको बीचमै ७० वर्ष पूरा भएपनि पूरै कार्यकाल काम गर्न पाउने व्यवस्था गरिएको बताउनुभयो ।

यसअघि ७० वर्षे उमेर हद कायम गर्न महाधिवेशनका प्रतिनिधिहरुले सुझाव दिएका थिए । त्यस्तै प्रतिनिधिहरुले एउटा व्यक्ति दुई पटक मात्र कार्यकारी पदमा रहन पाउने व्यवस्था गर्न पनि सुझाव दिएका थिए । जवाफ दिने क्रममा पौडेलले एक व्यक्ति दुई कार्यकाल मात्र कार्यकारी पदमा रहन पाउने व्यवस्था विधानमा राखिएको जानकारी दिनुभयो ।

एमाले अध्यक्ष ओली आगामी फागुनमा ७० वर्ष पुग्दै हुनुहुन्छ । त्यसअघि नै मंसिरमा एमालेले राष्ट्रिय महाधिवेशन गर्दैछ । ओलीलाई लक्षित गरेरै विधानमा उमेर हदसम्बन्धी व्यवस्थाको थप ब्याख्या र मंसिरमा महाधिवेशनको मिति तोकिएको एमाले नेताहरु बताउँछन् ।

विधानमा गरिएको ७० वर्ष उमेर हदको यस्तो व्याख्याले अब ओलीलाई अध्यक्षको उम्मेदवार हुन र निर्वाचित भए पाँच वर्षे कार्यकाल पूरा गर्न विधान बाधक नहुने निश्चित भएको छ ।