उमादेवी मन्दिरमा उभिएर कृष्णगोपालले भन्नुभयो ‘अष्टलक्ष्मीको सरकार जोगाउँछौं’

काठमाडौंको बल्खुस्थित उमादेवी मन्दिर हातामा उभिएर पूर्वमन्त्री तथा एमाले नेता कृष्णगोपाल श्रेष्ठले बाग्मती प्रदेशकी मुख्यमन्त्री अष्टलक्ष्मी शाक्यको सरकार टिकाउने कुरा गर्नुभएको छ ।

अरु छ वटै प्रदेशमा नभएको महिला मुख्यमन्त्री बाग्मतीमा रहेको र त्यो पनि एमालेको भएकाले कुनै हालतमा अल्पमतमा पर्न नदिने उहाँले त्यस अवसरमा बताउनुभएको हो ।

आज बिहान मन्दिर हातामा आयोजित दशै,शुभदिपावली,नेपाल सम्बत ११४१ तथा छठ पर्वको शुभकामना आदानप्रदान तथा चियापान र बागमती प्रदेशका आन्तरिक मामिला तथा कानुनमन्त्री डा. अजय क्रान्ति शाक्यलाई बधाई दिने कार्यक्रममा श्रेष्ठले उक्त कुरा बताउनुभएको हो ।

‘सरकार टिक्छ कि टिक्दैन थाहा छैन,तर हामी जोगाउँछौं । मन्त्रीहरुले पनि पदमा बसुञ्जेल राम्रो काम गर्नु,’ श्रेष्ठको भनाइ हो यो । एमाले विभाजित भएर नेकपा एकीकृत समाजवादी गठनपछि बाग्मती प्रदेश सभामा मुख्यमन्त्री शाक्यको सरकार स्पष्ट अल्पमतमा परेको छ ।

संविधानतः सत्तारुढ दल विभाजन भएपछि लिनुपर्ने विश्वासको मतसमेत शाक्य नेतृत्वको सरकारले लिने सुरसार देखिएको छैन ।