क्यानाडामा नजरबन्द हाकिमको चीनमा भव्य स्वागत
क्यानाडामा झण्डै तीन वर्षको नजरबन्द जीवन बिताएकी हुवावेइ कम्पनीकी प्रमुख वित्त नियन्त्रक तथा हाकिम मङ वानचौलाई चीनमा भव्य स्वागत गरिएको छ । अदालतको आदेशपछि नजरबन्द मुक्त भएर स्वदेश फर्किएकी मङको सेन्जन विमानस्थलमा भव्य स्वागत गरिएको हो ।
हुवावेइ कम्पनीको संस्थापककी छोरीसमेत रहेकी मङ शनिबार साँझ चीनको राष्ट्रिय ध्वजावाहक एयर चाइनाको विशेष विमान चढेर हुवावेइको प्रधान कार्यालय रहेको सेन्जन पुगेकी हुन् । उनको भव्य स्वागतको सरकारी टेलिभिजनमा प्रत्यक्ष प्रसारण गरिएको थियो ।
शक्ति र विजेताको प्रतिक रातो रंगको पोशाक लगाएकी मङले आफूलाई एक हजारभन्दा बढी दिनको कष्टपूर्ण नजरबन्दीको जीवनबाट मुक्त गराएकोमा सत्तारुढ चिनियाँ कम्युनिष्ट पार्टी र राष्ट्रपति सी जिन पिङ्गप्रति विशेष आभार व्यक्त गरेकी छन् ।
४९ वर्षीया मङलाई सन् २०१८ को डिसेम्बरमा अमेरिकाले लगाएको आरोप र वारेन्टमा भान्कुबर विमानस्थलबाट पक्राउ गरिएको थियो । त्यसपछि उनलाई क्यानाडाको भान्कुवरस्थित उनको निवासमा झण्डै तीन वर्ष नजरबन्दमा राखिएको हो ।
अमेरिकाले हुवावेइको पछिल्ला दूरसञ्चारसम्बन्धी प्रविधिमा अमेरिका र पश्चिमा राष्ट्रहरुको जासुसी गर्ने विशेष उपकरण प्रयोग गरेको समेत आरोप लगाउने गरेको छ ।
त्यसैगरी मङले सन् २०१३ मा इरानमा दूरसञ्चार उपकरणको कारोबारमा एचएसबीसी बैंकलाई झुठो व्यहोरा उपलब्ध गराएर बैंक ठगी गरेको गम्भीर आरोपसमेत लगाएको छ ।
टिप्पणीहरू