यी हुन् बिधानवारे सुझाव दिने एमालेका टोली नेता

हिजोदेखि जारी नेकपा एमालेको केन्द्रीय कमिटी बैठकमा विधान महाधिवेशनका लागि प्रस्तुत तीनवटा दस्तावेजमाथिको समूहगत छलफलको निष्कर्ष सुनाउन टोली नेता छानिएका छन् ।

हिजोको बैठकमा भूगोलका सात प्रदेशसहित प्रवास,उपत्यका विशेष र जनवर्गीय संगठन तथा विभागहरुबाट प्रतिनिधित्व गर्ने केन्द्रीय सदस्यहरुको १० वटा समूह बनाएर राजनीतिक,सांगठानिक प्रतिवेदन र विधान मस्यौदामाथि समूहगत छलफल भएको थियो । बैठकमा उक्त छलफलको निचोड प्रस्तुत गर्न टोली नेता छानिएको हो ।

टोली नेताका रुपमा प्रदेश १ बाट हिक्मत कार्की,प्रदेश २ बाट रामचन्द्र मण्डल,वागमतीबाट आनन्द पोखरेल, गण्डकीबाट जगत विश्वकर्मा र लुम्बिनीबाट दलबहादुर राना छानिएका छन् । त्यस्तै, कर्णालीबाट यमलाल कडेल, सुदूरपश्चिमबाट कर्ण थापा,उपत्यका विशेषबाट माधव ढुंगेल र जनवर्गीय संगठन तथा विभागहरुबाट खिमलाल भट्टराईले आ-आफ्नो समूहको निष्कर्ष सुनाउनेछन् ।

बैठकमा अध्यक्ष केपी ओलीको राजनीतिक प्रतिवेदन, महासचिव ईश्वर पोखरेलको संगठनात्मक प्रतिवेदन र उपमहासचिव विष्णुप्रसाद पौडेलको विधान संशोधन प्रस्तावमाथि छलफलका लागि केन्द्रीय सदस्यहरुको समूह बनाइएको हो । समूहगत सुझावमाथि ओली, पोखरेल र पौडेलले जवाफ दिने बताइएको छ ।