जंगली हात्तीले महिलाको ज्यान लियो, कोशी टप्पु आसपास आतंक

कोशी टप्पु क्षेत्रमा जङ्गली हात्तीले आक्रमण गरी एक महिलाको ज्यान लिएपछि स्थानीय वासिन्दा त्रसित बन्न पुगेका छन् । हात्तीको आक्रमणमा परेर सुनसरी बराहक्षेत्र नगरपालिका ११ खत्वे टोलकी ६५ बर्षीया ममनी देवी खत्वेको मृत्यु भएको छ । हिजो दिउँसो सोही गाउँका रामनाथ पाठकको माछा पोखरीमा घाँस काट्दै गर्दा उनलाई हात्तीले आक्रमण गरेको थियो । वन्यजन्तु आरक्षभित्र आश्रय लिएर बसेको सो हात्तीले अचानक निस्केर आक्रमण गरेको हो । प्रत्यक्षदर्शीका अनुसार उनलाई हात्तीले उठाउँदै, पछार्दै गर्नुका साथै खुट्टाले शरीरका विभिन्न भागमा बारम्बार कुल्चेको थियो । अन्य गाउँलेले देखेर होहल्ला गरेपछि हात्ती आरक्षको जङ्गलतर्फ भागेको थियो । आक्रमणमा घाइते खत्वेलाई उपचारको लागि धरान लैजाने क्रममा बाटैमा मृत्यु भएको थियो । मान्छे मार्न पल्केको हात्तीले मान्छेमाथि नै आक्रमण गर्ने भएकोले गाउँलेहरु त्रसित भएका हुन् ।

उदयपुरको रामपुर र सुनसरीका कोशी टप्पु क्षेत्रमा जङ्गली हात्तीको समूहले एक साता यता घरहरु भत्काउनुका साथै अन्नबाली नष्ट गर्दै आएको छ । उदयपुर बेलका नगरपालिकाका विभिन्न वडाहरुमा आधा दर्जनभन्दा बढी घर भत्काएको छ भने भकारीको धान पनि खाएको छ । हात्तीको बिच्काइँ रोक्न स्थानीयहरु असफल भएका छन् । उनीहरुले हात्तीको आक्रमणबाट जोगिन बिजुलीको तार घर वरिपरि राखेका छन् । तर पनि हात्तीले क्षति गर्न नछोडेको बेलका १ तपेश्वरीका जय चौधरीले बताउनु भयो । गाउँलेहरुले बिजुलीको तारले सुरक्षित राखेको घर छोडेर अन्य घरमा आक्रमण गर्ने र बाटैबाटो हिंडेर जङ्गली हात्तीले चतुर्याइ देखाएको बताएका छन् । हात्ती भगाउनको लागि ट्रयाक्टर प्रभावकारी भए पनि राती सुतेको बेला गाउँ पस्ने भएकोले सोचेभन्दा बढी क्षति पुग्ने गरेको बताइन्छ ।

जङ्गली हात्तीको समूहले प्रत्येक वर्ष उदयपुर र सुनसरीमा एक दुई जनाको ज्यान लिने गरेको छ भने घर भत्काउनुका साथै बालीनाली खाएर क्षति पुर्याउँदै आएको छ ।